Kandidati i Ramës, Vangjel Tavo fiton zgjedhjet në Himarë

Kandidati i PS-së, Vangjel Tavo është kryetari i ri i Bashkisë së Himarës. Vangjel Tavo ka siguruar fitoren me 1477 vota më shumë se rivali i tij në garë, Petro Gjikuria.

Numërimi i kutive në 36 qendrat e votimit në Bashkinë Himarë përfundoi në orën 06:59 të mëngjesit të sotëm (5 Gusht).

Sipas, rezultatit zyrtar të Komisionit Qendror të Zgjedhjeve, Vangjel Tavo ka siguruar Bashkinë Himarë me 5022 vota. Ndërkohë, kandidati i PD-së, Petro Gjikuria ka marrë 3545 vota.

Kujtojmë që opozita ditën e djeshme ka denoncuar faktet se si e gjithë administrata shtetërore ishte e përqëndruar në Himarë. Sipas opozitës, Edi Rama e vodhi fitoren edhe në Himarë ashtu siç ka bërë në të gjithë Shqipërinë.

• Kush është Vangjel Tavo

Ishte viti 1996 kur Vangjel Tavo nisi angazhimin e tij në politikë nën siglën e Partisë Socialiste. Aderimin në këtë forcë politike e vijoi deri në vitin 2010 ku më pas u largua, pas debateve brenda partisë me kryesocialistin Edi Rama. Ai më pas iu bashkua Lëvizjes Socialiste për Integrim, me kryetar Ilir Metën.

Kujtojmë se për një periudhë 1-vjeçare, në vitet 2012-2013 Tavo shërbeu si Ministër i Shëndetësisë, duke zëvendësuar Petrit Vasilin

Sakaq, në zgjedhjet parlamentare të 2013-ës dhe 2017-ës, Tavo u zgjodh deputet në qarkun e Gjirokastër. Ai vijoj të kandidonte në këtë qark edhe në zgjedhjet e 25 prillit 2021 por nuk mundi të fitonte mandatin e deputetit dhe më pas u shkëput nga politika aktive.

Ndërkohë, këtë vit ai u propozua dhe emërua nga qeveria Rama si prefekt i qarkut të Vlorës, detyrë që e mbajti pak para zgjedhjeve për kryetar bashkie të Himarës.

• Reagimi i Tavos

Pasi fitoi zgjedhjet në Bashkinë e Himarës, Vangjel Tavo i PS-së nuk ka harruar propozimin për rivalin e tij në garë. Ai i rikujtoi propozimin kandidatit të opozitës së koalicionit ‘Bashkë Fitojmë’, Petro Gjikurisë, që mori 41.17% të votave që është i mirëpritur si nënkryetar i bashkisë.

“Fillojmë nga puna, të gjithë për Himarën e bashkuar pa probleme dhe të qetë. Festë nuk ka do vazhdojmë nga puna. Prioritet do të jetë turizmi, oferta ka qenë e sinqertë, Gjikuria i mirëpritur për nënkryetar”, tha Tavo.

• Reagimi i Ramës

Kryeministri Edi Rama ka uruar kandidatin e tij Vangjel Tavo i cili fitoi në zgjedhjet e pjesshme të Bashkisë së Himarës.

Megjithëse gjatë qeverisjes së “Rilindjes” janë larguar rreth 1 milionë shqiptarë nga vendi, Rama përsëriti thirrjen që të kthehen në atdhe të gjithë emigrantët që punojnë në zonat turistike në Greqi.

“Me urimin për kryebashkiakun e ri të Himarës për fitoren spektakolare, kënaqësinë e mbështetjes domethënëse për Partinë Socialiste në zgjedhjet e djeshme, si edhe vendosmërinë për ta kthyer Himarën 2030 në një prej destinacioneve më të kërkuara të Mesdheut, ku në radhë të parë të gjithë ata që punojnë në industrinë turistike në Greqi, të kthehen për paga më të mira e për ajrin e pazëvendësueshëm të vendlindjes, ju uroj të gjithëve një javë sa më të qetë”, shkruan Rama.

• Mediat greke: Fitoi kandidati i “importuar” i Ramës në Himarë

“Protothema” shkruan se i zgjedhuri i Edi Ramës, Vangelis Tavos (Vangjel Tavo), është fituesi i zgjedhjeve në Himarë për emërimin e pasuesit të Fredi Belerit, kryebashkiaku i zgjedhur dhe tashmë eurodeputeti që mbetet në burg.

Përfaqësuesit e zgjedhjeve të Omonia-s komentuan me kuptim se “terrorizmi fitoi në Himarë”.

Nga ana e tij, Tavos në deklaratën e tij të parë falënderoi përzemërsisht Edi Ramën dhe strukturat e tij të Partisë Socialiste për mbështetjen e dhënë.

Kujtohet se beteja e zhvilluar së fundmi nga qeveria shqiptare ishte me të gjitha mjetet për të parandaluar një tjetër surprizë të pakëndshme me zgjedhjen e Petro Gjikorisë, i cili mbështetet nga Omonia dhe partitë opozitare dhe është pasardhësi i kombinimit Beleri që fitoi zgjedhjet e majit 2023, dhe që kandidati i “importuar” të fitojë, pasi vjen nga Dropulli, ish-deputeti i Partisë Socialiste Vangelis Tavos.

• Rama shtoi numrin e zgjedhësve në Himarë, mbi 6000 të tjerëve iu privua e drejta e votës

Mbi 6000 qytetarë nuk u lejuan të votonin në zgjedhjet e 4 Gushtit për shkaktë ID të skaduara. Opozita e ka cilësuar akt anti-Kushtetues përjashtimin nga e drejta e votës të qindra qytetarëve për shkak të skandencës së dokumenteve të identifikimit.

Përsa i takon zgjedhësve në krahasim me vitin 2023 kemi 252 zgjedhës më shumë. Nga viti 2021 deri në 2023 kur del lista për zgjedhjet vendore rezultuan 8 votues më pak ndërkohë para një viti deri më sot kemi 252 më shumë dhe 331 transferime nga bashkitë e tjera jo vetëm për të jetuar por edhe për të votuar.