Kryeministri Edi Rama ka folur nga Himara për numrin e turistëve që kanë ardhur në Shqipëri këtë vit, krahasuar me vitin e kaluar.
Sipas tij, teoria që numri i turistëve është ulur, bie poshtë sepse shifrat tregojnë që numri i turistëve për këtë vit është 150% më i lartë se vitin që lamë pas, edhe pse një pjesë e tyre ankohen për çmimet e papërballueshme në jug të vendit.
Për të justifikuar dështimin e sezonit turistik ku plazhet nga veriu në jug kanë më pak pushues, Rama thotë se është normale që të rriten çmimet në Palasë dhe Ksamil, kjo për shkak të kërkesës së madhe. Jo vetëm në këto dy zona (Ksamil-Palasë) por në shumë vende një familje e shtresës mesatare e ka të pamundur të përballojë çmimet stratosferike të “zaptuesve” të bregdetit shqiptar, ku një shezlon me një çadër kushton nga 50-150 euro, më shtrenjt se një dhomë luksoze që mund të rezervohet në Greqi, Turqi, Kroaci apo edhe Itali.
“Jo që s’ka rënie, po turistët e huaj krahasuar me vjet janë rritur rreth 150%. Problemi është që, patjetër që në vende të caktuara si Palasa, Ksamili kanë pasur një kërcim irracional të çmimeve, po kjo është çështje e tregut. Çështja kryesore është që hotelet janë supër plotë, ndërkohë që numri i restoranteve është rritur në krahasim me numrin e shtretërve. Ka shumë ofertë dhe restorantet që kanë rritur çmimin, kanë bërë që klientët t’ju drejtohen vendeve më të arsyeshme.
“Shqiptarët e Kosovës vijnë më shumë këtë vit sesa vjet, rreth 130 mijë automjete që kanë hyrë në Morinë. Më korrik është pak më shumë se vjet. Ne patjetër kemi nevojë të shikojmë politikën e plazheve, kemi zbatuar atë 30 për qindëshin, po në mënyrë vertikale dhe tani po punojmë edhe me një ekspertizë ndërkombëtare. Do vendosim një tjetër kriterë të uljes së numrit të çadrave të privatit”, tha Rama.
