Adulla Hoxhaj, 44 vjeç, Bojken Turtulli, 21 vjeç, Rifat Avdiaj, 62 vjeç, të 3 banues në Tiranë, janë personat e arrestuar lidhur me operacionin e koduar “INKORPORIMI” ku u godit një grup kriminal që merrej me trafikun ndërkombëtar të armëve.
Policia njoftoi se përveç këtyre tre të arrestuarve janë edhe 3 shtetas të tjerë të cilët janë shpallur në kërkim.
Këta persona, në bashkëpunim me njëri tjetrin, trafikonin armë zjarri nga Shqipëria drejt Britanisë.
Policia gjatë këtij operacioni ka arritur që të sekuestrojë 25 armë zjarri (24 pistoleta dhe 1 kallashnikov), qindra fishekë, lazera që i montohen armëve speciale dhe shërbejnë për qitje në distancë, dhe pajisje optike. Gjithashtu janë sekuestruar edhe veshje kamuflazhi si ato të forcave speciale, 4 automjete, 8 celularë, karta SIM, 2 laptopë dhe 2 armë të ftohta (thika).
