Efektet anësore të të nxehtit mbi shëndetin manifestohen atëherë kur sistemi i brendshëm i rregullimit të temperaturës nuk arrin të eleminojë sasinë e tepërt të nxehtësisë me qëllim ruajtjen e vlerave normale të temperaturës trupore.
Periudha të zgjatura me kushte meteorologjike ekstreme, të karakterizuara nga rritja e temperaturave mbi vlerat e zakonshme, imponojnë ndërmarrjen e disa masave për parandalimin dhe trajtimin e efekteve anësore të nxehtësisë mbi shëndetin.
Mjekja Aurora Dollenberg u shpreh se pacientët duhet të kujdesen që në oraret e drekës të ruhen nga ekspozimi i diellit, duke qëndruar në ambiente me ajër të kondicionuar. Mjekja pohoi se qytetarët rrezikojnë të pësojnë infarkt zemre nga çrregullimet e ritmit të shkaktuara prej vapës dhe temperaturave të larta.
“Stina e verës është e mbushur me urgjenca jo vetëm për shkak të tensionit të ulët apo çrregullimit të zemrës apo shumë sëmundje të tjera bëjnë që mosha pediatrike apo të moshuarit të bëhen pre e këtyre çrregullimeve. Këto bëjnë që shumë shpesh të sëmurit të përfundojnë tek pavionet e urgjencës pasi kemi një infarkt zemre nga çrregullimet e ritmit, ndërkohë që fëmijët e vegjël ju mjafton një diarre që të humbasin lëngjet shtesë.
Nga ana tjetër edhe temperaturat përmes djersitjes janë po ashtu një kërcënim për humbje të madhe të lëngjeve, kështu që tek fëmijët e shoh shpesh që vuajnë nga temperaturat e larta e deri në konfluzion, fëmijë që vijnë me atak epileptike.
Këshilla që japim ne si mjek familje apo urgjence është që pacientët të kujdesen në oraret e drekës duke u ruajtur nga ekspozimi i diellit, të qëndrojnë në ambiente më ajër të kondicionuar, duke mos e tepruar me kondicionerët që të jenë në ambiente shtëpiake 20 gradë e jashtë 40 gradë“, tha mjekja per Syri tv.
