Ministri i Financave, Ervin Mete pranoi se raportet për koncesionet ishin “të vonuara dhe të mangëta”, por ia pasoi përgjegjësinë ministrive të tjera në cilësinë e autoriteteve kontraktore.
I thirrur në një interpelancë parlamentare të enjten, ministri i Financave, Ervin Mete pranoi se raportimet që kjo ministri kishte detyrim të bënte ishin të vonuara dhe të mangëta, por hoqi përgjegjësinë nga vetja për këtë mungesë transparence në menaxhimin e fondeve publike.
Tabloja që paraqiti Mete në Kuvend tregonte për një refuzim të autoriteteve kontraktore për të raportuar në Ministrinë e Financiare për ecurinë e zbatimit të kontratave me partneritet publik-privat, duke mos bërë kështu transparente se për çfarë paguhen miliona euro në vit nga buxheti i shtetit.
“Janë autoritetet kontraktore që monitorojnë zbatimin nëpërmjet njësive të tyre të menaxhimit të kontratave dhe janë ato që raportojnë në ministrinë e Financave, që në vijim bëhet ky raport,” tha Mete, duke i kërkuar deputetit Agron Shehaj, i cili e kishte thirrur në interpelancë, që t’u drejtohej institucioneve të tjera.
“Autoriteti kontraktor është ai që ka njësinë e zbatimit të projektit dhe bordet e monitorimit dhe që raportojnë pastaj në ministri të Financave për pagesat buxhetore…”- këmbënguli Mete, duke shtuar se kjo ministri kishte bërë “përpjekje për të mbledhur raportimet nga të gjitha entet dhe autoritetet kontraktore”.
Mete nuk dha një përgjigje sepse mungonte në raport raportimi për një prej kontratave më të shtrenjta për ndërtimin e një rruge, asaj Thumanë-Kashar, duke u mjaftuar me ‘s’ka pasur raportim nga autoriteti kontraktor’.
Por ai premtoi se dikasteri i tij do të hartonte deri në shtator një dokument të risqeve fiskale pasi detyrimi i ministrisë ishte të analizonte risqet fiskale të këtyre këtyre kontratave.
Sipas Shehajt, Mete s’mund ta trajtonte raportimin mbi kontratat koncensionare si një burokraci, por si një domosdoshmëri për të monitoruar pagesat buxhetore.
“Fajin dhe përgjegjësinë e keni ju dhe nëse minstritë e tjera nuk u japin informacione shkoni në SPAK,” paralajmëroi ai.
Deputeti kërkoi sqarime mbi raportin e fundit të ministrisë, për të cilin ai tha se ka mungesë totale informacioni për rrugën Thumanë-Kashar, ndërsa e cilësoi tallës informacionin e dhënë për kontratat e tjera.
“Ne dimë sa para jep shteti koncesionarëve, por nuk kemi asnjë informacion mbi ecurinë e investimeve që privatët duhet të kishin bërë, zbatimin e afateve…,” tha ai.
Në raportin e publikuar në qershor koncesione të tilla si Rruga e Kombit, Aeroporti i Rinasit, Rruga e Arbrit e të tjera, mbartin përshkrime të llojit: “janë në fazë ndërtimi”, apo “punimet vazhdojnë”, por nuk përcaktohet ecuria e investimeve të dakordësuara dhe në asnjë rast nuk paraqiten të dhëna, siç ka ndodhur në raportet e viteve të mëparshme, për rastet kur kontraktori privat ka shkelur kushtet kontraktuale.
Me kërkesën e Fondit Monetar Ndërkombëtar 6 vite më parë Ministrisë së Financave iu dha një detyrë ligjore që të përgatisë një raport të përvitshëm mbi ecurinë e koncesioneve dhe ky raport duhej të ishte publik, pjesë e projekt-buxhetit të shtetit duke besuar se kështu transparenca do të nxiste llogaridhënien e qeverisë për menaxhimin e fondeve publike të dhëna me koncension. Ky raport nuk u publikua sipas këtij parashikimi në vitin 2022 dhe 2023./BIRN
