Shqipëria la për herë të parë pas Malin e Zi për numrin e net qëndrimeve të regjistruara në hotele dhe struktura të ngjashme akomodimi gjatë muajit Maj, por vendi mbetet ende dukshëm më ulët se konkurrentët e tjerë të rajonit.
Instituti i Statistikave raportoi se gjatë në Maj strukturat akomoduese në Shqipëri regjistruan 510 mijë net qëndrime gjithsej me një rritje prej 31 për qind krahasuar me majin e vitit të kaluar. Sipas INSTAT, kjo rritje erdhi e gjitha nga turistët jo rezidentë, ndërsa vetë shqiptarët kanë fjetur më pak në hotele krahasuar me një vit më parë.
Por si qëndron Shqipëria në këtë tregues krahasuar me vendet e tjera të rajonit?
Sipas të dhënave të Eurostat, mbretëresha e turizmit në Ballkan mbetet Greqia. Gjatë muajit Maj, Greqia regjistroi plot 15 milionë net qëndrime në hotelet, bujtinat dhe strukturat e tjera akomoduese të saj. Pas Greqisë, në vendin e dytë renditet Kroacia.
Hotelet në Kroaci regjistruan gati 7 milionë net qëndrime gjatë majit të këtij viti, sipas Eurostat. Serbia, një vend i cili nuk hyn tek lista e destinacioneve të nxehta turistike, regjistroi 1.2 milionë net qëndrime në maj, ndërsa pas lista plotësohet nga Mali i Zi dhe Maqedonia e Veriut të cilat regjistruan respektivisht 500 mijë dhe 200 mijë net.
Krahasimi i të dhënave të net qëndrimeve në raport me numrin e popullsisë tregon se Shqipëria mbetet larg të qënit një destinacion me industri të mirëfilltë turistike. Kroacia ka një popullsi rreth 50 për qind më të madhe se Shqipëria, por numëron 12 herë më shumë net qëndrime. Greqia ka një popullsi 4.3 herë më shumë se Shqipëria, por regjistron 30 herë më shumë net qëndrime në hotele. Ndërsa në pikun e sezonit ky raport rritet edhe më shumë.
Arsyet se pse numri i net qëndrimeve në hotelet dhe strukturat e tjera akomoduese shqiptare nuk përkon me propagandën e qeverisë që e sheh Shqipërinë si destinacioni europian i momentit janë disa. Por dy më kryesoret prej tyre listohen fryrja artificiale e numrit të turistëve që raportojnë autoritet si dhe informaliteti i madh i këtij sektori./ Kapitali.al
