Është mbajtur këtë të martë seanca në Gjykatën e Shkallës së Parë të Elbasanit seanca gjyqësore ndaj Dritan Dajtit, ku ky i fundit ka marrë pjesë online nga burgu.
Dritan Dajti ka kërkuar lirimin nga qelia me pretendimin se i ka mbaruar dënimi me 25 vite burgim, vendim i dhënë nga Gjykata e Apelit, e cila i pranoi gjykimin e shkurtuar.
Në seancën e sotme mungonte prokurori Neritan Hoxha i larguar nga vetingu, por Prokuroria përfaqësohej nga prokurorja Glenda Zeneli. Ndërkohë nuk është pranuar kërkesa e mbrojtjes për përjashtimin e trupit gjykues të kryesuar nga gjyqtarja Suela Lika .
Gjatë seancës, përfaqësuesja e zyrës juridike të Burgut të Peqint ka raportuar në Gjykatë për kohën e vuajtjes së dënimit nga Dritan Dajti, ku sipas saj, e kanë të pamundur për t’i llogaritur saktë vitet vuajtjes së dënimit.
“I kemi dërguar shkresë Drejtorisë së Përgjithshme të Burgjeve dhe Ministrisë së Drejtësisë për të na ndihmuar për përllogaritjen e kohës së dënimit, pasi kanë ndryshuar disa vendime dhe për ne është bërë e vështirë përllogaritja e saktë e përllogaritjes së viteve të dënimit.”, tha ajo.
Në këto kushte, Burgu i Peqinit nuk ka bërë përllogaritje për Dritan Dajtin, as për periudhën e para daljes së vendimit të Gjykatës së Lartë.
Dritan Dajti në reagimin e tij pyeti “si është e mundur që Burgu i Peqinit nuk përllogarit vitet e vuajtura”, duke shtuar se “Burgu i Peqinit po merr atributet për të llogaritur vendimet e gjykatave që nuk është kompetencë e saj”.
Ndërkohë që seanca e rradhës u caktua për t’u zhvilluar më 30 korrik në ora 09:00.
Dritan Dajti është shpallur fajtor për vrasjen e 4 efektivëve Kastriot Feskaj, Fatos Xhani, Altin Dizdari dhe Sajmir Duçkollari, ngjarje kjo e ndodhur në vitin 2009, ku mbeti i vrarë dhe Ledjon Mara.
Dritan Dajti dhe avokati i tij Alban Kapxhiu i janë drejtuar me një shkresë drejtorit të burgut të Peqinit duke i kërkuar lirimin më datën 4 Korrik. Në shkresë thuhej se “nga “Dinamika e vuajtjes së dënimit për të dënuarin” rezulton se nga data e arrestimit, datë 07.08.2009, deri më datë 30.04.2024 i dënuari ka vuajtur gjithësej 24 vjet, 8 muaj e 13 ditë”.
Sipas avokatit të Dritan Dajtit, dënimi ka përfunduar, por drejtori i burgut të Peqinit Florenc Doka, ende nuk e ka nxjerrë urdhrin me shkrim që personeli i institucionit të kryej veprimet për lirimin e tij.
Gjithsesi, vlen të theksohet fakti se vendimi i Gjykatës së Apelit për dënimin me 25 vite burg të Dritan Dajtit është rrëzuar nga Gjykata e Lartë, e cila ka rikthyer në burg përjetë me një vendim të datës 11 qershor.
Dritan Dajti ishte në prag të lirimit nga qelia, por Prokuroria në mars të vitit 2019 ankimoi vendimin e Gjykatës së Apelit për Krime të Rënda, e cila vendosi pranimin e kërkesës për gjykim të shkurtuar të Dritan Dajtit dhe duke ulur dënimin e tij në 25 vite burgim.
