Policia e Lezhës në bashkëpunim me atë të Tiranës ka arrestuar dy persona dhe ka shpallur në kërkim një tjetër, pasi akuzohen se nëpërmjet mashtrimit duke u prezantuar si zyrtarë vendorë u merrnin para biznesmenëve.
Në kuadër të operacionit policor të koduar “Imposter” janë vënë në pranga shtetasit Shkëlqim Domi, 35 vjeç dhe Saimir Sallaku 37 vjeç, të dy banues në Shijak. Ndërsa është shpallur në kërkim shtetasi Shefik Kurti 63 vjeç, banues në Itali.
Sipas autoriteteve policore, këta shtetas i kanë marrë 15 mijë euro administratori të një biznesi, duke iu prezantuar atij në aplikacionin “Signal”, në emër të përfaqësuesve të institucioneve vendore. Me të njëjtën skemë mashtrimi kanë tentuar t’i marrin 20 mijë euro dhe një biznesmeni tjetër.
“Nga veprimet hetimore dyshohet se shtetasit Shkëlqim Domi dhe Saimir Sallaku, në bashkëpunim me shtetasin Shefik Kurti, më datë 14.07.2024, kanë përfituar 15 000 euro, nga administratori i një operatori ekonomik, duke komunikuar me të në aplikacionin “Signal”, në emër të përfaqësuesve të institucioneve vendore. Më datë 17.07.2024, ata kanë tentuar të përfitojnë një tjetër shumë të madhe parash, nga ky shtetas, me anë të së njëjtës skemë. Në bashkëpunim me strukturat hetimore të DVP Tiranë, vijojnë hetimet për zbardhjen e një rasti të ndodhur një Tiranë, ku këta shtetas kanë tentuar të përfitojnë 20 000 euro, nga një shtetas, me anë të kësaj skeme mashtrimi.” – thuhet në njoftimin e Policisë.
Materialet procedurale i kaluan Prokurorisë së Lezhës për veprën penale “Mashtrimi” me pasoja të rënda, kryer në bashkëpunim.
