Kreu i Lëvizjes Bashkë, Arlind Qori tha përmes një lidhje “Skype” me MCN se përgjegjësi kryesor i skandaleve korruptive në Bashkinë e Tiranës është kryebashkiaku Erion Veliaj. Gjithsesi, sipas tij, pavarësisht këtij fakti, kjo nuk do të thotë që vartësit e tij janë të pafajshëm.
Qori tha se deri më tani Erion Veliaj rezulton i paprekshëm pavarësisht se përgjegjësitë e tij janë të mëdha.
“Duhet pritur fundi i hetimeve dhe duhet parë nëse në fund të procesit do të ketë ose jo një akuzë për atë që unë mendoj se është përgjegjësi kryesor i skandaleve korruptive në Bashkinë e Tiranës, që është kryetari Veliaj. Fakti që Veliaj është përgjegjësi kryesor për skandalet korruptive nga inceneratori i Tiranës tek kompania 5D dhe tek lejet e ndërtimit nuk do të thotë që zyrtarët poshtë tij janë engjëj të pafajshëm që ne duhet t’i mëshirojmë. Bëhet fjalë për njerëz që kanë abuzuar me firmën e tyre, me pushtetin, janë bërë shumë të pasur duke vjedhur, duke i lënë gjurmët e tyre korruptive kudo. Kam një kërkesë për institucionet e drejtësisë, që ta çojnë hetimin e tyre deri në fund dhe të mos amnistojnë dhe të mos falin neglizhojnë përgjegjësitë e askujt.
Nuk i njoh peripecitë, apo luftën e brendshme të klaneve brenda ish-mjaftistëve apo brenda PS-së sotme. Unë e njoh për keq Maznikun, që nga viti 2014 kur ai ishte zëvendësministër i Arsimit. Më është dashur të debatoj shpesh me të, pasi asokohe ishte mbrojtësi më i fortë i ligjit të asokohshëm, ligjit të arsimit të lartë. Ligji i arsimit të lartë i vitit 2014 ka qenë një nga aktet e para korruptive të qeverisë Rama dhe një akt korruptiv që ka favorizuar pronarët e universiteteve private dhe ky ligj nuk është hetuar kurrë.
Këtu ka dy shpjegime të mundshme. Ose Veliajn do e gjejë së afërmi kjo gjë, në muajt në vijim ose në javët në vijim. Ose Veliaj ka mbrojtjen e paligjshme të Ramës që ndoshta ka ndikim mbi institucionet e reja të drejtësisë. Nuk jam i gatshëm të them nëse është i prekshëm apo i paprekshëm. Deri tani rezulton i paprekshëm edhe pse përgjegjësitë e tij janë shumë të mëdha.” – tha Arlind Qori.
