Rritja ekonomike e Kinës ngadalësohet në tremujorin e dytë
Publikimi i dobët i të dhënave vjen, ndërsa udhëheqja e partisë komuniste nis takimin e politikave ekonomike.
Ekonomia e Kinës u rrit 4.7 % në tremujorin e dytë, ndryshe nga parashikimi dhe duke shënuar një normë më të ngadaltë zgjerimi krahasuar me tre muajt e mëparshëm.
Ekonomia e dytë më e madhe në botë është përballur me kërkesën e dobët të konsumatorit dhe një ngadalësim të zgjatur të tregut të pronave, duke nxitur një ndërhyrje më të madhe nga politikëbërësit në muajt e fundit, për të forcuar besimin.
Publikimi i të dhënave erdhi pasi Komiteti Qendror i Partisë Komuniste Kineze, nisi plenumin e tretë, një takim katër-ditor në të cilin lidershipi i vendit pritet të përcaktojë drejtimin e politikës ekonomike. Ngjarja e fundit e tillë u mbajt në vitin 2018.
Pekini ka shtyrë të përmirësojë sektorin e tij të prodhimit, si pjesë e një ndryshimi afatgjatë drejt theksimit të “zhvillimit me cilësi të lartë” në fusha të tilla si, automjetet elektrike dhe inteligjenca artificiale.
Prodhimi industrial i mposhti pritjet, duke u rritur 5.3 % në qershor, raportoi të hënën Byroja Kombëtare e Statistikave, ndërsa shitjet me pakicë u rritën vetëm 2 % në të njëjtin muaj, duke i humbur pritshmëritë me një diferencë të madhe. Investimet e aktiveve fikse u rritën me 3.9 % në gjysmën e parë të 2024.
Ekonomia e Kinës ka përfituar nga eksportet më të forta, të cilat u rritën 8.6 % në qershor krahasuar me një vit më parë, megjithëse importet ranë me 2.3 %, në një shenjë të mëtejshme të kërkesës së dobët.
Çmimet e konsumit u rritën vetëm 0.2 % në qershor, me rritjen e mbërthyer në territor të ulët ose negativ gjatë vitit të kaluar.
Çmimet e shtëpive të reja ranë 4.5 % muajin e kaluar, ritmi më i shpejtë i rënies në nëntë vjet, ndërsa fillimet e ndërtimit të ri dhe investimet në prona, ranë përkatësisht 23.7 % dhe 10.1 % në gjysmën e parë të vitit.
Pekini ka vendosur një objektiv të rritjes ekonomike për vitin rreth 5 %, pas rritjes prej 5.2 % në 2023.
Vëzhguesit po ndjekin nga afër plenumin e tretë për shenja të stimulimit të mëtejshëm, veçanërisht në sektorin e strehimit në vështirësi, pasi autoritetet në maj thanë se ndërmarrjet shtetërore do të ishin në gjendje të blinin banesa të pashitura.
BE muajin e kaluar ndoqi SHBA-në në shpalljen e tarifave më të larta për makinat elektrike kineze.
Disa banka ulën parashikimet e tyre për rritjen ekonomike të Kinës.
Goldman uli vlerësimin e rritjes së PBB-së për vitin 2024, nga 5 % në 4,9 %, ndërsa JPMorgan uli parashikimin nga 5,2 % në 4,7 %. Oxford Economics tha se objektivi për vitin e plotë ishte ulur në 4.8 %, “një nënvlerësim i lehtë i objektivit zyrtar të rritjes”.
