Eksperti i mjedisit dhe përfaqësuesi i organizatës që kujdeset për mbrojtjen e natyrës, PPNEA, Zydjon Vorpsi, thotë se Vjosa u shpall park kombëtar dhe zonë e mbrojtur, por se shpallja ishte vetëm për rrjedhën e lumit dhe pjesa tjetër rrezikon.
Ndërsa një vit më pas ekspertët e mjedisit janë në alarm për kërcënimin që i kanoset deltës së Vjosës, Vorpsi deklaroi për MCN se për të mbrojtur një territor, nuk mjafton vetëm rrjedha, pasi ajo që u la jashtë parkut kombëtar është pjesa më e rëndësishme, delta e tij, e cila është e njohur për biodiversitein që në rastin konkret është Vjosë-Narta, zonë që ka qenë e mbrojtur.
“Brenda këtij territori filloi ndërtimi i aeroportit të Vlorës. Ndërtimi në zonat e mbrojtura, se ligji i ri i miratuar së fundmi, e lejon këtë. Zonat e fundit që kishim të mbrojtura nga betoni, u hapën për zhvillim. U miratua një ligj i ri zhvillimor për zonat e mbrojtura, pikërisht ato që duhet të kishin një zhvillim më në përputhje me natyrën. Një studim i fundit për deltat e lumenjve në Mesdhe, rezulton se Shqipëria është vendi i fundit me tre delta të shëndetshme, një prej tyre është delta e Vjosë-Nartës.
Flasim për një ekosistem shumë të pasur, që në kushte e një shteti ligjor, nuk duhet të kishim nevojë që shkencëtarët të vinin dhe të mblidhnin më shumë të dhëna. Ka vlera të larta natyrore dhe i shërben njeriut me ato që ofron. Grupi organizator do ta publikojë studimin në momentin që ky raport përfundon, por në çdo vizitë apo hap që hidhet në Vjosë, pjesa e dunave ranore që janë unike në Shqipëri dhe bëjnë mbrojtjen e parë që toka ka nga vërshimi, për të zbutur përmbytjet. Gjetjet do evidentohen dhe do pasqyrohen nga grupi i shkencëtarëve që e vizituan dhe ata dolën në përfundim dhe thirrja që po bëjnë është se nuk duhet të ndodhë urbanizimi i deltës së Vjosës.
Nga qasja e këtyre viteve, atmosfera ndaj zonave natyrore, është për të ardhur keq, por dihej se qeveria nuk do të merrte një hap, i hapi rrugën të vetmes gjë që ndalohej, betonizimi i këtyre zonave të mbrojtura. Kthimi nga Butrint në Ksamil. Ne i kemi parë planet, janë resorte turistike masive që e zhbëjnë krejt zonën natyrore, qoftë Divjaka, Narta apo Butrinti. Në momentin që ke një ligj i cili shpreh se ndalohet ndërtimi në këto zona, në momentin që ndalohet ndërtimi, ti ke hequr ligjin e zonave të mbrojtura.” – tha ai.
I pyetur se sa e shqetësuar është qeveria shqiptare për këto zhvillime dhe e besoni se ajo do të rishqyrtojë prioritetet që lidhen me trashëgiminë natyrore, Vorpsi thotë se duhet t’i rishikojë dhe patjetër të ndryshojë rrjedhën që ka nisur.
“Pavarësisht se mendohet si hapje e hapësirave për turizëm dhe zhvillim, është një katastrofë që i ndodhë vendit tonë. Do të zhduken hapësira shumë të rëndësishme natyrore që nuk do rikthehen dot më. Nuk mendoj se do ketë një reflektim, pasi autoritetet e kanë shprehur qartë se synimi i tyre është turizmi i luksit, apo turizmi elitar.” – tha eksperti i mjedisit.
