Një 25 vjeçar me banim në Francë është arrestuar në Tiranë pasi akuzohet për mashtrim kompjuterik. Në cilësinë e provës materiale janë sekuestruar 1 automjet, 2 celularë, 1 lap-top dhe 400 euro.
Për të folur mbi këtë temë, i ftuar në RTSH 1, avokati Kujtim Cakrani u shpreh se zakonisht të dhënat e kartës vidhen në restorante. Cakrani tha se duhet treguar kujdes në përdorimin e kartës dhe të shmangni blerjet në çdo vend.
“Zakonisht ti vjedhin të dhënat e kartës kur shkon në një restorant për të ngrënë. Për shembull kamerieri, aty ku shkon të blesh ku përdor kartën, marrin kodin, marrin te dhënat dhe pastaj fillojnë të vjedhin. Prandaj thashë që alarmi ynë duhet të jetë kudo pavarësisht se ne mendojmë se jemi të sigurt në banka. Jam njeri që kam frikë, sa herë që e përdor kartën sidomos jashtë shtetit kam shumë frikë”, u shpreh avokat Cakrani.
Eksperti i IT-së, Erion Demiri u shpreh se vjedhja e informacionit në restorante është metoda më e vjetër. Eksperti i IT-së theksoi gjithashtu se duhet të tregoheni të kujdesshëm ku do të përdorni kartën.
“Ajo është mënyra më e vjetër, e vjedhjes së informacionit të një kartë. Në momentin që ne kemi gjëra që dikush do të donte ti kishte është e qartë që duhet të jemi të kujdesshëm. Në momentin kur futet teknologjia brenda, shumica e personave nuk janë aq familjare . Unë nuk kam asnjë lloj frikë kur përdor kartën por duhet kujdes. Duhet të keni parasysh që restoranti ka një POS ku ti e merr dhe e fut kartën, ky është një veprim që duhet ta bëjë para syve të tu, nuk duhet ta marri kartën dhe ta fusi diku tjetër jo në sy të klientëve”, tha Demiri.
