Rruga e Arbrit është kthyer në një ‘makth’ për shqiptarët.
Mbi të gjithë ata që penalizohen akoma më rëndë janë banorët e zonës të cilët çdo ditë përballen me trafik të rënduar për shkak të bllokimit të rrugës (pa njoftim) sipas tekave të kompanisë që kryejnë punimet duke “ia nxirë jetën” shoferëve.
Mesditën e sotme një qytetar ka dërguar një denoncim në redaksinë e “Boldnews.al” ku shprehet se firma që po kryen punimet vendos dinamit në mes të ditës duke rrezikuar jetën e qytetarëve.
“Shih ç’ka bahet mesditë duke hedhur dinamit duke punuar qe ju rrezikojnë jetën mijëra udhëtarëve. Sa agjensi udhëtojnë çdo ditë në rruga e Arbrit, plus makina private. Kjo është qeveria e Edi Ramës dhe Belinda Ballukut. Radha e makinave është me kilometra”, shprehet qytetari.
Denoncim në ‘boldnews’ për bllokimin e Rrugës së Arbrit:
Radhës kilometrike i shtohet si problematikë edhe temperaturat e larta ku vendi ynë po përballet me të nxehtin afrikan ndërsa fëmijë dhe të moshuar janë të detyruar që të presin për orë të tëra në pikë të vapës.
Është absurde pasi këto punime në rrugën e Arbrit dhe shpërthimet me dinamit firma e ndërtimit duhet t’i kryejë gjatë natës dhe jo pikërisht në mes të ditës duke “paralizuar” lëvizjen drejt veriut të vendit.
Kjo nuk është hera e para që bie “propaganda” e dyshes Rama-Balluku, e cila si pasojë e keqmenaxhimit por edhe e arrogancës po shkakton trafik të rënduar në çdo cep të vendit.
Kujtojmë që vetëm pak ditë më parë u raportua për trafik të rënduar në Tunelin e Llogarasë e cila është hapur para kohe për të kryer propagandën dyshja Rama-Balluku.
Më pas u shkaktua kaosi edhe në autostradën Kashar-Thumanë ku dy sportelet e hapura nuk përballonin dot fluksin e automjeteve pasi pagesa e tarifës në to krijonte radhë të gjata makinash në autostradë duke bllokuar kështu qarkullimin.
Ndryshe nga sa tha fillimisht Balluku, në autostradën Kashar-Thumanë qytetarët duhet të paguajnë tarifën më të lartë (2.5 euro) duke e kthyer këtë aks një ndër më të shtrenjtët në Europë.
