Kryetarja e degës së Partisë Demokratike në Himarë, Afrovita Dhimojani ka reaguar në lidhje me zyrtarizimin e emrit të Petro Gjikurisë si kandidaturën e opozitës për kreun e Bashkisë së Himarës në 4 Gusht.
Në një postim në rrjetet sociale, Dhimojani shkruan se si të gjithë qytetarët është informuar nga mediat për kandidaturën e tij, pasi sipas saj, askush nuk i ka informuar apo të jetë konsultuar me demokratët e Himarës për kandidaturën e Gjikurisë, duke u vendosur para faktit publik.
Afrovita Dhimojani shton më tej se është e padrejtë që angazhimi dhe lufta e degës së PD-së së Himarës prej më shumë se një viti intensiv, të shpërfillet pa u konsideruar, duke luajtur me Himarën dhe fatin e saj.
Gjithsesi, ajo thotë se nuk dëshiron që ta paragjykojë kandidaturën e Petro Gjikurisë për shkak se nuk e njeh, teksa shprehet e sigurt për fitoren në 4 gusht.
Reagimi i plotë:
Të dashur Himariot dhe Himariote! Ditën e sotme u zyrtarizua kandidatura e Koalicionit BF, z.Petro Gjikuria për zgjedhjet e pjesshme të 4 Gushtit. Si drejtuese e PD Himarë, u informova si te gjithë qytetarët nga mediat për këtë vendimarrje politike. Ndjej detyrimin dhe angazhimin për të sjell në vëmendje se ne si degë, nuk jemi informuar e as konsultuar përsa i përket kandidaturës, por jemi vendosur para faktit publik.
Nuk është e drejtë që lufta dhe angazhimi i PD Dega Himarë prej më shumë se një viti intensiv, të shpërfillet pa u konsideruar, duke luajtur me Himarën dhe fatin e saj. Konsesusi politik për të diskutuar me bazën kandidaturat potenciale është e vetmja rrugë për të vendosur në vend padrejtësinë e votës Himariote, që u mohua më Datën 14 Maj!
Duke mos e njohur, nuk dua të paragjykoj kandidaturën e zyrtarizuar si një alternativë për më të mirën e Himarës, jemi besimplotë për fitoren e Datës 4 Gusht. Himara meriton vërtetësi! Kryetare e Partisë Demokratike Dega Himarë.
