Është zbuluar identiteti i punonjësit të Federatës Shqiptare të Futbollit, i cili dyshohet se ka abuzuar seksualisht me punonjësen e një hoteli, gjatë qëndrimit në Gjermani të kombëtares shqiptare për pjesëmarrjen në “Euro 2024.
Mediat raportojnë se bëhet fjalë për shtetasin Orgest Tujani, ndihmës magazinier i Federatës Shqiptare të Futbollit, i cili mësohet se është pezulluar nga puna. 26-vjeçari dyshohet se ka abuzuar seksualisht me një vajzë 18-vjeçare, pastruese e hotelit të shkollës sportive Kaiserau në Kamen, ku ishte akomoduar kombëtarja kuqezi.
Nga të dhënat paraprake mësohet se punonjësja e pastrimit, e ka marrë në fillim Tujanin si futbollist të kombëtares shqiptare, e duket se ka dhënë shenja afrimi. Por më pas kur ka mësuar të vërtetën, është sjellë ftohtë, por duket se punonjësi i FSHF-së ka vijuar me insistimin për të krijuar një relacion me punonjësen.
Pastruesja e hotelit në qendrën sportive Kaiserau, ka lajmëruar policinë e qytetit Unna pas sulmit seksual, më 23 qershor në orën 19:30.
E reja i tha policisë se shqiptari e kishte marrë në kuzhinë, e kishte puthur dhe kishte abuzuar seksualisht me të. Edhe pse prokurori publik u informua menjëherë për veprën e raportuar seksuale, i akuzuari mundi të fluturonte drejt Shqipërisë i papenguar ditën pas përfundimit të sfidës Shqipëri-Spanjë.
Sipas Bild, zëdhënësja e prokurorisë që po heton ngjarjen tha se për momentin nuk ka një kërkesë për urdhër arresti nuk është paraqitur.
“Kujdesi ndaj punonjëses dhe mbrojtja e të drejtave të saj personale kanë përparësinë kryesore”, tha një zëdhënëse e “SportCentrum Kaiserau”.
Pasi u bë e ditur ngjarja, zv.magazinieri i FSHF-së u pezullua menjëherë nga Federata Shqiptare e Futbollit.
