Rritja ekonomike e Shqipërisë u ngadalësua gjatë tremujorit të parë të këtij viti, ndërsa “cilësia” e rritjes u përkeqësua më tej, me rënie të theksuar në industri dhe bujqësi si dhe me rritje të konsiderueshme në ndërtim dhe në sektorin publik. Turizmi dha ndikim minimal.
Ekonomia shqiptare pësoi rënie në dy sektorët më të rëndësishëm të punësimit, sektorit të bujqësisë si dhe në manifakturë, ndërsa njohu rritje në sektorin e ndërtimit, të pronave të patundshme dhe të sektorit publik.
Të dhënat e publikuara nga Instituti i Statistikave të hënën tregojnë se rritja ekonomike u ngadalësua në 3.63% të tremujorin e parë por sektori i bujqësisë, i cili i shërben një pjese të konsiderueshme të popullsisë, pësoi rënie në masën 1.73%. Bujqësia ka qenë në stanjacion përgjatë të gjithë vitit 2022 dhe për pjesën më të madhe të vitit 2023 ndërsa në dy tremujorët e fundit ka rënë respektivisht 3.04 dhe 1.73%. Një sektor ekonomik konsiderohet zakonisht në recesion nëse ka dy tremujorë radhazi me rënie.
Sektori tjetër i rëndësishëm ai i manifakturës, ku përfshihet industria fason dhe ku punësohen dhjetëramijëra shqiptarë kryesisht të varfër, pësoi rënie në masën 6.75%. Sektori i industrisë në tërësi, ku përfshihen edhe industria e rëndë, minierat apo energjia elektrike, pësoi një rënie më të përmbajtur në masën 1%.
Përkundrejt kësaj, sektori i ndërtimit u rrit me 14% ndërsa administrata publike u rrit me gati 8%. Sektori i pronave të patundshme u rrit me 5.9%. Sektori i shërbimeve, ku përfshihet edhe turizmi, u rrit me 4.63%.
Ekonomia shqiptare ka njohur tashmë rritje me dy shpejtësi, ku sektori i ndërtimit dhe i pronave të patundshme kanë pësuar rritje të fortë ndërsa bujqësia e industria kanë pësuar rënie dhe sektori i shërbimeve, rritje të ngadaltë./BIRN
