Në vitin 2021, lajmërimi i legalizimit në Zvicër të së ashtuquajturës ”Sarco”, një makineri e krijuar për të lejuar vdekjen e asistuar me prekjen e një butoni, kishte ngritur një valë të fortë polemikash, shkruan il messaggero.it.
Tani, sipas asaj që raporton gazeta zvicerane NZZ, pajisja do të testohet për herë të parë në javët në vijim. Ideja e sarkofagut i lindi Philip Nitschkes, një australian, i cili ka qenë gjithmonë një mbështetës i vdekjes së asistuar.
Ndërsa mbështetësit e shohin ”Sarco”-n si një mjet për të siguruar një vdekje dinjitoze dhe pa dhimbje, kritikët vënë në pikëpyetje sigurinë dhe etikën e një pajisjeje të tillë.
”Sarco”, i përshkruar si një kapsulë futuriste e ngjashme me një makinë ”Tesla”, është quajtur “Tesla e eutanazisë”.
Makina funksionon duke mbushur kapsulën me azot, duke privuar pacientin nga oksigjeni dhe duke çuar shpejt në humbje të vetëdijes dhe vdekje.
Philip Nitschke, avokat i zjarrtë i vdekjes së asistuar, tha se pajisja lejon një vdekje të shpejtë dhe pa dhimbje. Në një intervistë për ”Daily Mail”, Nitschke shpjegoi se si funksionon makina.
Procesi fillon me hyrjen e pacientit në kapsulë, e ndjekur nga përgjigjja e tre pyetjeve themelore “Kush je ti?”, “Ku je?” dhe “A e dini se çfarë ndodh nëse shtypni butonin?”.
Pasi të përgjigjet verbalisht, softueri aktivizon makinën, duke i lejuar përdoruesit të shtypë butonin që fillon procesin. Pavarësisht miratimit ligjor në Zvicër, ku vetëvrasja e asistuar është e ligjshme disa organizata si ”Dignitas” dhe ”Exit” ofrojnë shërbime të ngjashme.
Kerstin Nowlle Vokinger, profesoreshë e së drejtës dhe mjekësisë në Universitetin e Zyrihut, theksoi se ”Sarco” mund të ketë nevojë për certifikim sipas ligjit zviceran të pajisjeve mjekësore.
Për momentin, një certifikatë e tillë nuk është marrë. Pa të, Nitschke mund të përballet me probleme të rëndësishme ligjore si prodhues i pajisjes.
