Janë zbardhur detaje të reja nga helmimi i banorëve të Bulqizës. Mësohet se që prej pasdites së djeshme dhe gjatë ditës së sotme në spitalin e Bulqizës janë parqitur rreth 30 persona, kryesisht të moshës 30-40 vjeç, por mes tyre ka pasur edhe fëmijë.
Pacientët janë paraqitur në spital për të marrë ndihmël mjekësore, pasi kanë patur simptoma helmimi, si të vjella dhe temperaturë. Pacientët e dyshuar të helmuar nuk kanë qenë të gjithë të një lagjeje apo fshati, por të shpërndarë në Bashkinë e Bulqizës.
Dyshimet paraprake janë se ata mund të jenë helmuar nga uji i pijshëm. Mësohet se në Qytetin e Ri në Bulqizë, po bëhen punime në rrjetin e ujërave të zeza. Kjo ka ngritur dyshime se për shkak të ndonjë incidenti apo gabimi, ujërat e zeza, mund të jenë përzier me ujin e pijshëm, duke sjellë kështu edhe helmimin e banorëve.
Policia raporton se është ngritur grupi hetimor dhe nën drejtimin e Prokurorisë kanë nisur hetimet për zbardhjen e rrethanave dhe përcaktimin e shkakut të helmimit.
Kjo është një ngjarje e përsëritur në Bulqizë, pasi e njëjta situatë ndodhi edhe Qershorin e vitit të kaluar, ku ndërhyrja në rrjetin e ujit të pijshëm të fshatit Gjoricë shkaktoi helmimin e rreth 40 banorëve. Në atë kohë u tha se 64-vjeçari Kadri Muça, pronar i një HEC-i në zonën e Gollobordës, kishte montuar një tub plastik në rrjetin e ujësjellësit dhe kjo ka sjellë përzierjen e ujit të pijshëm të fshatit me ujërat e zeza. Banorët, pas konsumimit të ujit, përfunduan në spital me shenja helmimi.
