Drejtuesi i departamentit të shëndetësisë në Partinë Demokratike, Ilir Alimehmeti ka deklaruar se të gjithë kanë qenë në dijeni të asaj që ka ndodhur tek spitali Onkologjik, por është sëmundja e kancerit e cila e bënë më të ndjeshme këtë rast abuzimi.
I ftuar në A2CNN, Alimehmeti rendit disa nga shkeljet që ka gjetur KLSH në këtë institucion shëndetësor, teksa kritikon dhe disa nga politikat e ndjekura nga qeveria përmes programeve të ndryshme.
“Fenomenin tek Onkologjiku njerëzit e dinin. Sëmundja e kancerit është më e rënda që kemi. Nuk është shkaku i parë i vdekjes, por për shkak të bjerrjes dhe koha e gjatë e vuajtjes, dhimbja e madhe, e bën sëmundjen më sensitive. Kështu që ndjeshmëria jonë vjen në pah. Ne jemi një shtet që investojmë pak në Shëndetësisë, jemi dhe pas Kosovës. Ne paguajmë shumë për shëndetësisë. Mungesat në Onkologjik jo vetëm i kemi ditur, por janë të raportuara nga KLSH. Kemi mësuar për mungesë barnash dhe pajisjesh. Të gjithë situatën e dinim. Këto lloj situatash krijohen ku ka mjegull. Gjithkush që ka shkelur ligjin duhet të hetohet dhe dënohet. Por aman të gjitha janë të pafajshëm deri sa të flasë gjykata.
KLSH na thotë për mungesën e pajisjeve shëndetësore, ka hetuar 13 preparate kimio dhe thotë që këto vijnë me mungesë për shkak tenderësh dhe furnizimi. Po e dhe kimion me vonesë, zëre se nuk e ke dhënë. Rekomandimet duhet të zbatohen. KLSH na flet për programin kombëtar të kontrollit të kancerit që duhet të na jepte shumë informacion për të ditur sa pajisje duhet të blejmë, sa ilaçe duhet të kemi, ne duhet të kemi të dhëna. Dhe KLSH thotë që nuk ka një raport nga programi kombëtar i kontrollit të kancerit. Po për çfarë i kemi atëherë, i bie të jetë kot”, tha Alimehmeti.
