Nga Boldnews.al
“Pal Trashaj doli nga pika e informacionit, në hyrje të SPAK-ut, shumë i acaruar, duke bërtitur me zë të lartë. Unë dhe kolegu im, Fatmir K., iu afruam dhe e pyetëm nëse kishte nevojë për ndihmë, por na tha se nuk kishte nevojë…”.
Këto ishin momentet, pak para se njëri nga mijëra viktimat e skemës gjigante mashtruese të mikro-kredive, historiani 63-vjeçar, Pal Trashaj, të pinte helmin fostoksinë, në kangjellat e godinës së Strukturës së Posaçme Anti-Korrupsion (SPAK).
Dëshmia është dhënë para oficerëve të Policisë Gjyqësore të Komisariatit nr.3, nga Lavdrim H, oficeri i rojes i Gardës së Republikës, i planizuar në hyrjen e SPAK-ut.
Ishte ora 12.00 e mesditës së të martës, 2 Korrik 2024. Pal Trashaj nga Lezha, një prej mijëra viktimave të skemës mashtruese të mikro-kredive, kërkonte një takim me drejtuesin e SPAK-ut, Altin Dumani.
Për shumë arsye, ky takim nuk u arrit. Pal Trashaj del nga godina e SPAK-ut dhe, pas disa të bërtiturave në shenjë revolte, ulet pranë kangjellave rrethues të oborrit të godinës, në anën e djathtë.
“..E pashë që nga goja nxori disa kokrra, të ngjashme me mentet dhe më tej i hodhi në tokë..”, vijon dëshminë e tij oficeri i Gardës, që ishte personi i parë që kontaktoi me Pal Trashajn, pasi ai futi në trupin e vetë helmin e rrezikshëm.
Ishte një veprim i shpejtë, duket i mirëmenduar nga Pal Trashaj dhe që nuk i dha mundësi asnjë personi që ishte aty pranë, përfshirë edhe gazetarët që ndjekin veprimtarinë e SPAK-ut, për ta parandaluar aktin ekstrem.
Për disa minuta Trashaj qëndroi i mbështetur në hekurat e godinës së qelqtë të Prokurorisë së Posaçme, ndoshta si një formë e fundit e revoltës ndaj asaj që ai konsideronte si mos-veprim të institucioneve shtetërore dhe të drejtësisë për “skemën mashtruese të mikro-kredisë”.
Pamjet e medias treguan se ai hipi me këmbët e tij në ambulancën që erdhi ta merrte, megjithëse me shumë vështirësi. Disa orë më vonë, në 7 të mëngjesit të datës 3 shtator 2024, organizmi i 63-vjeçarit Pal Trashaj nuk e përballoi efektin e fortë të fostokskinës dhe ndërroi jetë në Urgjencën e Qendrës Spitalore Universitare Tiranë (QSUT)
Pal Trashaj ishte një intelektual dhe aktivist i njohur në qytetin e Lezhës. Ai ishte organizuar dhe pjesëmarrës në shumë aktivitete kulturore e historike, që shërbenin për të promovuar qytetin e tij të lindjes, por edhe të të gjithë Shqipërisë.
Vite më parë, Trashaj kishte marrë kredi në një bankë të nivelit të dytë. Kur i kishin mbetur pa shlyer edhe rreth 75 mijë lekë të reja, historiani dhe intelektuali lezhjan ishte gjendur në vështirësi financiare për të paguar këstet e fundit.
Në këtë moment, hyn në lojë “babëzia” e kompanive të mikro-kredive, të cilat blejnë kreditë e këqija nga bankat e nivelit të dytë, përfshirë edhe atë të Pal Trashaj.
Mekanizmi abuziv nis funksionin dhe detyrimi i Pal Trashaj, nga 75 mijë lekë të reja, kapërcen në mbi 450 mijë lekë të reja. Ky detyrim i ri i vendos litarin në fyt.
Në pamundësi për të paguar këtë borxh të fryrë, ai dhe familja e tij përballen me veprime përmbarimore, me bllokim të llogarive bankare dhe të apartamentit ku jetonte.
Në vitin 2022, kishte dorëzuar një kallëzim penal pranë SPAK-ut, me shpresën se do të kryheshin hetime për atë grup zyrash e përmbaruesish, të cilët kishin nisur të vepronin me format e “grupit të strukturuar kriminal”.
Kallëzimi i Pal Trashaj nuk u mor në konsideratë nga Prokuroria e Posaçme, e cila ia kaloi për kompetencë prokurorisë së Lezhës.
Deri në korrik të këtij viti, Pal Trashaj duket se ka parë që e drejta e tij nuk po vihej në vend. Kërkoi takim me drejtuesin e SPAK-ut, por nuk mundi të takohej.
Prokuroria e Posaçme thotë zyrtarisht se u ngarkua një oficer i Byrosë Kombëtare të Hetimit, por Pal Trashaj u largua pa marrë sqarime dhe u ul tek kangjellat e oborrit të godinës, ku ndërmori edhe aktin fatal.
Tashmë, oficerët e Policisë Gjyqësore të Komisariatit 3 po përgatisin materialin për t’ia përcjellë Prokurorisë së Tiranës për të vlerësuar rastin e vetëvrasjes së 63-vjeçarit, Pal Trashaj.
