Në takimin e fundit në kuadër të dialogut mes Kosovës dhe Serbisë në nivel kryenegociatorësh është diskutuar edhe hapja e dy pikave permanente kufitare mes dy vendeve dhe dy të tjera sezonale.
Konkretisht është diskutuar hapja e pikës në Izvor mes Zveçanit dhe Novi Pazarit, e njëjta rrugë që u shfrytëzua për kalim edhe nga terroristët për sulmin në Banjskë. Ndërsa pika e dytë e kalimit kufitar ishte propozimi në Kapi të Sfircës, zonë mes Kamenicës dhe Medvegjës.
Të dy këto pika ishin paraparë edhe në kuadër të marrëveshjes për Menaxhimin e Integruar të Kufirit të vitit 2015, por që nuk është zbatuar nga pala serbe.
Megjithëse, kërkesa vlerësohet e drejtë dhe normale, nuk pritet që hapja e këto pikave të jetësohet.
“Në parim hapja e pikave kufitare është gjëja më normale mes shteteve por duke njohur situatën praktike në terren vlerësoj se këto janë vetëm veprime taktike për të përfituar kohë sepse hapja e pikave kufitare në praktikë është e pamundur, e parealizueshme dhe nuk mund te materializohet në këtë situatë”, tha Valdet Hoxha, ish-zv/ministër i Brendshëm.
Kosova ka propozuar që të hapen edhe dy pika të tjera sezonale në zonën e Bujanocit për të lehtësuar lëvizjen e qytetarëve.
“Mendoj se me të drejtë Kosova ka parashtruar një kërkesë që të shtohet këto pika kufitare porse vullneti nga pala e Serbisë mungon që të ketë pika të reja kufitare apo edhe është dëshmuar se Kosova ka pasur vullnet me hap pika të reja kufitare porse nga ana e Serbisë ka munguar një vullnet i tillë”, shprehet Fidan Ukaj, politolog.
Në lidhje me këto ide, tashmë ka mbetur në kompetencën e Bashkimit Evropian për të sjellë në tryezë propozimet konkrete për pikat e reja kufitare. Aktualisht mes Kosovës dhe Serbisë janë 6 pikë kalime kufitare funksionale.
