Ish-ministri i Shëndetësisë Ilir Beqaj u arrestua këtë të enjte me urdhër të SPAK, pasi akuzohet për korrupsion dhe fshehje pasuri në lidhje me abuzimet me fondet e Agjencisë Shtetërore të Programin Strategjik dhe Koordinimit të Ndihmës (SASPAC) që monitoron milionat e ndihmës nga Bashkimi Evropian.
Sipas hetimeve të SPAK, Ilir Beqaj ka kryer procedura prokurimi fiktive në të paktën 8 tendera nga SASPAC si dhe ka kryer deklarim të rremë pasurie në vitin 2020, ku nuk ka deklaruar interesat tek restoranti “G’zona” tek Kalaja e Tiranës, si dhe automjetin që e kishte në emër të Ermal Kurtulajt.
Por, kur nisi hetimi ndaj Ilir Beqajt në kuadër të këtij procedimi, kryeministri Edi Rama e mbrojti publikisht Ilir Beqajn, gjatë një konference me gazetarët duke i hedhur poshtë faktet për vjedhjen e fondeve të BE-së. Kreu i Qeverisë tha se zyra e Beqajt në SASPAC nuk merrte fonde nga Bashkimi Europian duke i quajtur gënjeshtra lajmet për këtë.
“Ai ishte koordinator i ndihmës, në një institucion që nuk menaxhon fonde të BE. Është një zyrë koordinimi në funksion të qeverisë shqiptare dhe një urë komunikimi me donatorët për të mirë të akordimit të fondeve të cilat nuk kalojnë direkt, por te entitet e tjera. Zhurma e bërë për zhvatje fondesh të BE, është gënjeshtër. Pasi zyra nuk menaxhon fonde të BE. Nuk i kalojnë fonde as nga BE dhe nga asnjë institucion tjetër. Këto janë procese të drejtësisë. Nuk kam komente”, tha Rama në atë kohë.
Arrestimi i Beqajt/ SPAK: Abuzoi me 8 tendera të SASPAC, fshehu restorantin dhe makinën
