Ish-kryetari i Bashkisë së Shkodrës, Bardh Spahia ka folur për gjendjen e rëndë ku ndodhet aktualisht Velipoja. E njohur si një nga zonat turistike më tërheqëse të Shqipërisë, Velipoja duket se sivjet është braktisur nga Bashkia e Shkodrës, që drejtohet nga i zgjedhuri i Edi Ramës, Benet Beci.
Sipas Spahisë, në Velipojë mungon uji i pishëm, nuk funksionojnë banjat publike, plehrat janë bërë si male në atë zonë, pasi nuk pastrohen.
“Ka pasur një bllokim total nga kryeministri Edi Rama për fondet ndaj Shkodrës
Çuditërisht dhe në mënyrë të pashpjegueshme ka një braktistje të pashpjegueshme. Kjo qeveri dhe kjo mazhorancë këto biznesmen strategjik i sheh si zgjidhje për zonat turistike.
Duhej të ishte kulmi i sezonit tani më, por ne e kemi parë se nuk ka pasur një hapje sezoni për të promovuar Velipojën. Ka qenë traditë hapja e sezonit në Maj, për të bërë thirrje dhe nisur të gjitha shërbimet për atë zonë turistike të cilat më pas do të garantonin edhe mirëqënien për qytetarët që e frekuentojnë.
Sivjet ka pasur çuditërisht një mungesë të plotë vëmendje. Ka denoncime të vazhdueshme për situatën katastrofale të plehrave në Velipojë, që për hirë të vërtetës është aktuale edhe në qytetin e Shkodrës, një degradim i plotë i pastrimit në atë qytet.
Velipoja duhej të ishte një vend atraktiv për turistët e shumtë që e frekuentojnë atë zonë, ndërkohë që ka një mungesë vëmendje të plotë nga Bashkia e Shkodrës për të ofruar shërbimet jetike për qytetarët dhe për ta mirëmbajtur.
Problematika të jashtëzakonshme me ujin e pijshëm në atë zonë, me pastrimin, gjelbërimin e hapësirave publike që sjell edhe degradimin e një prej zonave më të rëndësishme për Shkodrën dhe për Shqipërinë’, tha Bardh Spahia në ‘Kafe Shqeto’ në SYRI TV.
