GJKKO ka shtyrë për në 2 korrik, ora 15:00, seancën gjyqësore ndaj kryebashkiakut të Shkodrës, Benet Beci, i cili akuzohet për shkelje të barazisë në tendera dhe ankande publike.
Seanca e planifikuar për këtë të hënë nuk u zhvillua, pasi në sallë mungonin disa prej të pandehurve dhe përfaqësuesit e tyre ligjorë. Edhe vetë Benet Beci nuk ishte i pranishëm në seancë, ndërsa u përfaqësua nga avokati i tij, Ervin Metalla.
Në seancë morën pjesë vetëm dy të pandehur, Premtim Dauti dhe Rudin Gjoni.
Pas kërkesës së Prokurorisë së Posaçme, gjykata vendosi shtyrjen e seancës për shkak të mungesës së mbrojtjes së disa të pandehurve, ndërsa paralajmëroi palët që të shmangin mungesat e pajustifikuara në vijim të procesit.
Ndaj Becit është regjistruar procedim penal për veprën penale “Shkelja e barazisë së pjesëmarrësve në tendera apo ankande publike”, kryer në bashkëpunim. Më 23 prill 2025, prokurori i SPAK, Dritan Prençi, e mori zyrtarisht të pandehur kryebashkiakun e Shkodrës.
Çështja lidhet me një tender me vlerë rreth 700 mijë euro, të zhvilluar në vitin 2019, me objekt një projekt kërkimor për zhvillimin strategjik të sektorit energjetik.
Hetimet kanë nisur pas zbërthimit të telefonit të ish-drejtorit të Autoritetit Rrugor Shqiptar, Evis Berberi, ku sipas organit të akuzës janë evidentuar komunikime që ngritën dyshime për parregullsi dhe abuzime në procedurën e tenderimit.
Përveç Benet Becit, nën hetim për këtë çështje janë marrë edhe disa zyrtarë të tjerë që kanë pasur rol në Komisionin e Vlerësimit të Ofertave.
