Merih Demiral ishte heroi i Turqisë me dopietë në fitoren 2-1 kundër Austrisë, me turqit që kaluan në çerekfinalen e Euro 2024.
Demiral në festën e golave ka bërë edhe simbole të grupit ultra-nacionalist “Ujqërit Gri” teksa kërkohet dënimi i tij.
Ministrja e Brendshme gjermane, Nancy Faeser, ka reaguar për festimin e golit të mbrojtësit turk Merih Demiral kundër Austrisë.
“Simbolet e ekstremistëve të djathtë turq nuk kanë vend në stadiumet tona. Ne presim që UEFA të hetojë këtë çështje dhe ta ndëshkojë atë”, citohet të ketë thënë Nancy Faeser për Reuters.
“Përdorimi i Kampionatit Evropian si një platformë për racizmin është plotësisht i papranueshëm. Ne presim që UEFA të hetojë rastin dhe të marrë në konsideratë sanksionet,” shtoi ajo.
Kjo lëvizje ka një ideologji ekstremiste të krahut të djathtë dhe monitorohet nga Zyra Federale për Mbrojtjen e Kushtetutës në Gjermani, ndërsa disa vende e kanë cilësuar si organizatë terroriste.
“Ujqërit Gri” besojnë në epërsinë e racës turke dhe përpiqen për bashkimin e të gjithë popujve turq në një shtet, të shtrirë nga Ballkani përmes Azisë Qendrore deri në Kinë, në një perandori ku sipas tyre nuk ka vend për disidentët.
