Ministria e Jashtme e Greqisë ka reaguar në lidhje me vendimin e Gjykatës së Apelit, e cila la dënimin me dy vite burg për kryebashkiakun e zgjedhur të Himarës, Fredi Belerin.
Në një komunikatë zyrtare, Athina zyrtare u kërkon autoriteteve shqiptare që Beleri të lejohet të bëjë betimin në Parlamentin Evropian, pasi u zgjodh eurodeputet i partisë “Demokracia e Re” e kryeministrit grek Kyriakos Mitsotakis. Ai arriti të merrte 237 mijë vota, dzuke qenë kështu eurodeputeti i katërt më i votuar në shtetin helen.
Gjithashtu, Ministria e Jashtme e Greqisë thekson se ka patur rezerva për këtë proces gjyqësor që prej fillimit, duke shtuar se vendimi i sotëm vjen në mbështetje të këtyre shqetësimeve për nivelin e shtetit ligjor dhe mbrojtjen e minoriteteve në Shqipëri. Sipas saj, Bashkia e Himarës administrohet prej një viti nga persona që nuk kanë legjitimitet demokratik.
“Që në fillim, Greqia kishte shprehur shqetësimin dhe reflektimin e saj për shumë aspekte të çështjes lidhur me ndjekjen penale të kryebashkiakut të zgjedhur të Himarës, Fredi Beleri.
Në veçanti, rezervat lidhur me cenimin e prezumimit të pafajësisë, natyrën e provave të paraqitura, zbritjen e dënimit të tij, dhënien e një dënimi joproporcional dhe heqjen e së drejtës së tij për të bërë betim, me rezultat që Bashkia e Himarës administrohet prej një viti nga persona që nuk kanë legjitimitet demokratik.
Vendimi i sotëm i Gjykatës së Apelit Tiranë vjen në mbështetje të këtyre shqetësimeve për nivelin e shtetit ligjor dhe mbrojtjen e minoriteteve në Shqipëri.
Beleri sot nuk është vetëm kryetar i zgjedhur i Bashkisë së Himarës. Ai është gjithashtu anëtar i zgjedhur i Parlamentit Evropian. Pra është një detyrim i autoriteteve shqiptare që të marrin të gjitha masat e nevojshme për t’i dhënë atij mundësinë për të marrë pjesë në punimet e Parlamentit Evropian, duke filluar nga betimi i tij, korrikun e ardhshëm”, thuhet në deklaratën e Ministrisë së Jashtme.
