Ish-ministri i Brendshëm Saimir Tahiri ka dalë pas rreth 2 orësh e gjysmë nga Prokuroria e Posaçme (SPAK). I shoqëruar nga avokati i tij, Maks Haxhia, Tahiri nuk ka pranuar të prononcohet për mediat.
“Me vjen keq qe keni qëndruar kaq gjatë! S’kam asgjë për të thënë! Mirupafshim!”- u tha Tahiri gazetarëve.
Saimir Tahiri është thirrur nga prokurori Elvin Goga për t’u marrë në pyetje në lidhje me një hetim pasuror të nisur ndaj tij prej disa muajsh. Dyshohet se ish-ministri i Brendshëm e ka zhvendosur pasurinë në ndërtim, turizëm mjekësor dhe qendra estetike.
Burime për mediat bëjnë me dije se më herët në kuadër të ketij hetimi SPAK, ka pyetur edhe disa biznesmenë me të cilet familjarët e ish ministrit Tahiri kanë patur transaksione financiare. Prokuroria ka kërkuar informacion në bankat e nivelit të dytë, institucione e agjenci të pronave për të verifikuar pronat e llogaritë bankare të ish-ministrit të Brendshëm, dhe transaksionet që ai ka kryer që prej kohës kur ai mbante detyrën dhe deri më sot.
Prokuroria ka kërkuar informacion në bankat e nivelit të dytë, institucione e agjenci të pronave për të verifikuar pronat e llogaritë bankare të ish-ministrit të Brendshëm, dhe transaksionet që ai ka kryer që prej kohës kur ai mbante detyrën dhe deri më sot.
Saimir Tahiri është detyruar ditën e sotme të lërë shtëpinë ku vijonte të kryente dënimin sipas vendimit të gjykatës së Elbasanit. Ndërkohë është bërë rekurs në Gjykatën e Lartë vendimi i gjykatës së Elbasanit që urdhëroi lirimin e Tahirit dhe vuajten e dënimit në shtëpi.
Më 4 shkurt të vitit 2022, Apeli i Gjykatës Kundër Krimit të Organizuar dhe Korrupsionit pas një seance maratonë, dënoi Tahirin me 5 vite burg për “Shpërdorim të detyrës”. Por me gjykim të shkurtuar dënimi u ul në 3 vite e 4 muaj burgim. Tahiri u dënua vetëm për “Shpërdorim detyre” duke i ‘shpëtuar’ akuzave “Korrupsion të zyrtarëve të lartë”, “Trafik të lëndëve narkotike kryer në bashkëpunim” dhe “Grup të strukturuar kriminal”.
Ai qëndroi vetëm një vit e katër muaj në qeli,deri në 2 qershor 2023 kur Gjykata e Elbasanit mori vendimin që ish ministri dënimin e mbetur prej 1 vit e 8 muaj e 15 ditë ta kryente në banesën e tij.
