Përfaqësuesi i lartë i Bashkimit Europian për politikë të jashtme dhe siguri, Josep Borrell, është nderuar në Austri me çmimin Dr. Alois Mock Europe. Në Forumin Europian në Wachau, spanjolli falenderoi ministrin e jashtëm austriak, Alexander Schallenberg, ndërsa fokusin e fjalimit të tij e pati tek integrimi i Ballkanit Perëndimor në Union.
“Zgjerimi i mëparshëm ishte një histori suksesi. Zgjerimi i mëtejshëm do të jetë gjithashtu një histori suksesi. Problemi është sepse po vonohet për shumë kohë. Tani duhet ta përshpejtojmë. Të mos harrojmë se Europa nuk është e plotë derisa vendet e Ballkanit Perëndimor të bëhen anëtare,” tha Josep Borrell, përfaqësues i lartë i BE për politikë të jashtme dhe siguri.
Organizuesi i eventit sqaroi se Ballkani Perëndimor është zemra e Europës dhe jo oborri i saj.
“Unë jam gjithmonë i ashpër me ata që pretendojnë se Ballkani Perëndimor është oborri i BE-së, kjo është krejtësisht e gabuar. Nuk jemi të kompletuar derisa ata të jenë pjesë e familjes sonë dhe duhet ta përshpejtojmë këtë proces”, deklaroi Alexander Schallenberg, Ministër i Jashtëm i Austrisë.
Në këtë event morën pjesë të gjithë ministrat e jashtëm nga të 6 vendet e Ballkanit Perëndimor. Ata zhvilluan dhe një takim me përfaqësuesin e lartë të BE-së Borrell. Ky i fundit tha se u diskutua për ndërtimin e një Europe më të bashkuar.
