Gjykata e Apelit të Posaçëm ka rrëzuar kërkesën e avokatëve të kreut të PD-së Sali Berishës dhe dhëndrit të tij Jamarbër Malltezi, për ndryshimin e masës së sigurisë në lidhje me hetimet për dosjen e privatizimit të ish-kompleksit “Partizani”.
Ata kërkuan ndryshimin e masës “arrest shtëpie”, por Apeli ka lënë në fuqi vendimin e GJKKO-së. Vendimi është marrë nga gjyqtarja Ilirjana Olldashi.
Në një prononcim për mediat pas vendimit, avokati Genc Gjokutaj u shpreh se mandati i deputetit të Sali Berishës mbetet i pacenuar ligjërisht, pasi nuk mungon në Kuvend me dëshirën e tij.
“Berishës mandatin ia ka dhënë populli dhe nuk mungon në Kuvend për shkak të dëshirës së tij, pra pa arsye. Ne kemi bërë kërkesë në gjykatë, SPAK, Apel e Gjykatën e Lartë dhe ata kanë vendosur në kundërshtim me kushtetutën dhe praktikën e tyre. Kemi raste të arrestuarish që kanë shkuar në kuvend dhe kanë votuar. Nuk është për faj të tij, kështu që mandati i tij mbetet i pacenuar ligjërisht” – tha Gjokutaj.
Sa i takon vendimit të sotëm, Gjokutaj theksoi se SPAK ka zhvendosur fokusin e hetimit në probleme teknike e financiare që nuk kanë lidhje me procedimin dhe korrupsionin për të cilin është regjistruar kjo çështje.
“Gjykata miratoi vendimin e shkallës së parë. Por çfarë po bën SPAK-u kjo është pjesa më shqetësuese e këtij procesi ligjor që e ka zhvendosur fokuson e hetimit në probleme të nivelit teknik e financiar që nuk kanë lidhje me procedimin dhe korrupsionin për të cilin është regjistruar kjo çështje. Ne do të vazhdojmë rrugën tonë se ne nuk arrijmë të kuptojmë sesi kryhen veprime jashtë funksionit dhe qëllimit të çështjes. Ata po bëjnë akt ekspertim kontabël për të parë llogaritë dhe lëvizjet e parave. Nuk ka problem as midis bashkëpronarëve, as midis shitësve dhe blerësve. Nuk ka element të tillë. Problemi është që një akt ekspertimi kontabël nuk bëhet pas 3 vjetëve e gjysmë hetimi por menjëherë se nëse ka lëvizje të shumave që nuk korrespondojnë me kostot reale atëherë për çfarë flitet? Afatet e hetimi i ka përcaktuar ligji, këta janë duke i shtyrë. Berisha është duke qëndruar në paraburgim, ndërkohë që po kryhen veprime që nuk kanë lidhje me veprën penale të korruspionit. Hajde shpjegojeni ju dhe unë se ç’është kjo estradë juridike që këta po zhvillojnë” – tha Gjokutaj.
Berisha akuzohet nga SPAK për kryerjen e veprës penale “Korrupsioni pasiv i funksionarëve të larte shteterore ose te zgjedhurve vendore, kryer në bashkëpunim. Ish-kryeministri i ka konsideruar akuzat ndaj tij dhe dhëndrit të tij Jamarbër Malltezi, si sulm politik, pasi sipas tij, nuk ka asnjë fakt dhe dokument që të ngrihen dyshimet mbi akuzat.
Sipas SPAK-ut, Berisha në kohën kur ka qenë kryeministër ka vendosur në funksion të interesave të dhëndrit të tij bazën ligjore, si edhe ka ushtruar presion mbi vartësit për të nxitur plotësimin sa më të shpejtë të procedurave të kthimit të pronës dhe privatizimit të godinave të degraduara të ish-klubit sportiv “Partizani”.
Ndërsa, për Jamarbër Malltezin dhe ndërtuesin Fatmir Bektashi, SPAK-u deklaron se ata kanë përfituar shuma të mëdha financiare nga tjetërsimi i truallit në ndërtime të larta.
