Kryeministri Edi Rama në Asamblenë Kombëtare të PS-së, ka dhënë arsyet rreth shtyrjes së mitingjeve në Londër dhe Dyseldorf, pas atyre në Athinë dhe Milano.
Rama tha se arsyet ishin zgjedhjet e parakohshme në Angli dhe ndeshjet e kombëtares shqiptare në Gjermani. Ai theksoi se turi i takimeve me emigrantët do të vijojë në shtator, ku po planifikon edhe një miting në SHBA.
“Në Londër, për shkak se ka zgjedhje të parakohshme, u bë problem më vete marrja e sallës që kishim prenotuar. Në një situatë zgjedhore është normale që edhe ne të shmangnim një takim politik. Po kështu, duke qenë se parashikimi dhe përgatitja për takimin e Dyseldorfit ishte afër me ndeshjen e Kombëtares sonë, nuk do të donim të krijonim një ide të bashkimit të dy gjërave. Prandaj, turi do të vijojë në shtator me takimet e Anglisë dhe Gjermanisë, ndërkohë që do të përgatitemi edhe për një takim në SHBA”, u shpreh Rama.
