Policia e Shtetit ka ndërmarrë një aksion për të goditur tentativat e kultivimit të bimëve narkotike. Autoritetet raportojnë se si rezultat i kontrolleve, në qarqet Shkodër, Kukës dhe Vlorë janë gjetur dhe asgjesuar 6065 bimë kanabisi.
Pavarësisht gjetjes së mbi 6 mijë rrënjëve kanabisi, asnjë person nuk është arrestuar, ndërkohë që bëhet me dije se janë shpallur në kërkim 4 vëllezër në Selenicë, si dhe janë proceduar penalisht dy kryepleq fshatrash dhe dy inspektorë pyjesh, për shpërdorim detyre dhe për moskallëzim krimi.
Më konkretisht:
-shërbimet e Stacionit të Policisë Selenicë kanë gjetur në fshatin Mazhar, 741 bimë narkotike në proces tharjeje. Policia ka identifikuar 4 shtetas (vëllezër), autorë të dyshuar të kultivimit të këtyre bimëve, dhe po punon për kapjen e tyre. Gjithashtu, ka nisur procedimi penal për kryeplakun e fshatit Mazhar dhe për inspektorin e pyjeve, për veprën penale “Shpërdorimi i detyrës”;
-shërbimet e Komisariatit të Policisë Has kanë gjetur në fshatin Zahrisht, 1570 bimë narkotike. Për këtë rast janë referuar materialet në Prokurori ku ka nisur procedimi në gjendje të lirë për kryeplakun e fshatit dhe për inspektorin e pyjeve, për veprat penale “Shpërdorimi i detyrës” dhe “Moskallëzimi i krimit”.
-shërbimet e DVP Shkodër kanë gjetur në njësitë administrative Postribë dhe Toplanë, 3754 bimë narkotike.
Raportohet se strukturat hetimore të drejtorive vendore të Policisë Vlorë, Shkodër dhe Kukës, në bashkëpunim me prokuroritë respektive, vijojnë punën për identifikimin, kapjen dhe nxjerrjen përpara përgjegjësisë penale, të autorëve të kultivimit të bimëve narkotike.
