Shqipëria U19 triumfoi në ndeshjen e parë miqësore ndaj Kosovës U19 me rezultatin 2-0.
Kuqezinjtë dominuan takimin në stadiumin “Egnatia Arena”, aty ku protagonisti kryesor ishte sulmuesi Flavio Sulejmani, autori i dy gola brenda tri minutave.
Trajneri Julian Ahmataj debutoi me fitore në stolin kuqezi. Shqipëria e nisi sfidën me këtë formacion titullar: Gabriel Guri, Kleo Shpuza, Fabjan Perndreca, Antonis Dama, Adi Kurti, Jordi Jaku, Dean Vranici, Brajan Gjyla, Ron Hasani, Frederik Tosku, Flavio Sulejmani.
Kuqezinjtë shënuan gol që në minutën e 6-të. Sulejmani realizoi një gol shumë të bukur me një gjuajtje nga jashtë zone. 18-vjeçari i talentuar i Lazios nuk u ndal, teksa festoi sërish pas tri minutave. Këtë herë me kokë.
Sulmuesi kuqezi shfrytëzoi harkimin nga goditja e këndit dhe e dërgoi topin në rrjetë, duke vulosur rezultatin 2-0 për Shqipërinë U19. Në fraksionin e dytë kuqezinjtë administruan fitoren dhe rezultatin.
Ndeshja e dytë miqësore ndaj Kosovës U19, do të zhvillohet në datë 8 qershor, duke nisur nga ora 10:00 po në stadiumin “Egnatia Arena”.
