Ka nisur mbledhja e Komisionit Hetimor për të dhënat TIMS. Ditën e sotme janë thirrur për të dëshmuar ministri i Brendshëm Taulant Balla, ish-drejtori i IT-së në Policinë e Shtetit Ervin Muça dhe drejtori i Policisë Muhamet Rrumbullaku.
Por drejtuesi i Policisë së Shtetit, Muhamet Rrumbullaku ka ‘frikë’ nga mediat prandaj kërkoi që dëshmia e tij të jetë sekrete në mbledhjen e komisionit “TIMS”.
Rrumbullaku tha se nëse mbledhja bëhet e hapur do të flasë vetëm për ato që nuk janë sekret.
“Nuk dua te kem mbrojtës ligjor, do dëshmoj vetëm. Kërkesa jonë mbështetet në ligjin për komisionet hetimore dhe i qëndroj që dëshmia ime, përben sekret, për arsye qe do i shpjegoj pas vendimit te këtij komisioni. Ju kemi vene ne dispozicion materiale te paklasifikuara, por unë jam me shumë dokumente me vete, ligji për informacionin e klasifikuar, përcakton 4 nivelet e informacionit hetimor. Në të tre nivelet e tjera kërkohet pajisja me certifikatë respektive. Jam i hapur të jap shpjegime mbi sistemin TIMS se çfarë përfshin. Flitet parimisht sistemi TIMS. Unë nuk mund ta shkel në asnjë rast tagrin se çfarë përfshin dhe për çfarë shërben.’- tha Rrumbullaku.
Pak para se Drejtori i Përgjithshëm i Policisë së Shtetit, Muhamet Rrumbullaku do të japë dëshminë e tij në Komisionin Hetimor për të dhënat e TIMS, kreu i këtij komisioni Ervin Salianji ka kërkuar që të pranishme të jenë edhe mediat.
- Me votat e PS-së, Komisioni Hetimor vendos që mbledhja të zhvillohet me dyer të mbyllura
Më votat e Partisë Socialiste, u vendos që mbledhja e Komisionit Hetimor për ndërhyrjet në të dhënat e sistemit TIMS, ku do të dëshmojë Drejtori i Policisë së Shtetit Muhamet Rrumbullaku, të zhvillohet me dyer të mbyllura.
Tetë ishin votat pro zhvillimit të seancës me dyer të mbyllura dhe 6 vota kundër nga opozita.
“Unë do të hedh në votim kërkesën paraprake që Komisioni Hetimor të vlerësojë që deklarimi të vijojë të jetë i hapur për publikun. 6 pro, kundër ka? Abstenim nuk ka. Shumë mirë. Kush do që mbledhja të të bëhet në terr, njësoj si ndërhyrja në sistemin TIMS në errësirën, natën dhe pa vëmendjen e publikut duke iu fshehur të vërtetave që duhet të jetë transparencë. Kush është pro zhvillimit të mbledhjes me dyer të mbyllura? 8 pro, 6 kundër. Mbylleni. Njësoj si lakuriqët e natës, natën. Duke falënderuar median dhe publikun, ne do të kemi një komunikim më pas. Do të bëjmë 10 minuta pushim”, tha Salianji, kryetar i Komisionit.
