Deputeti i Partisë Demokratike, Tritan Shehu ka deklaruar se Parlamenti i Shqipërisë ka lënë një njollë turpi pas refuzimit të rezolutës për gjenocidin serb në Kosovë.
Shehu gjatë fjalës së tij, në seancën plenare, u shpreh se rezoluta e miratuar nga OKB për gjenocidin serb në Sebrenicë ‘është e njëjtë me rezolutën që ne kemi përgatitur për gjenocidin serb në Kosovë’.
“Kam kërkuar të flasë për një shkelje të parlamentit, e cila po bëhet gjithnjë e më shumë një njollë e zezë turpi. Pak ditë më parë, OKB votoi rezolutën për Srebrenicën. Ajo rezolutë është e ngjashme me atë rezolutë që në sollëm këtu në parlament për të miratuar dhe ju e rrëzuat.
Asambleja e OKB e miratoi duke future Rajonin në këtë mënyrë Rajonin tonë në një epokë të re, të njohjes së krimeve dhe gjenocideve, dënimit të tyre, si garanci e forcimit së stabilitetit për të ardhmen.
Une mendoj se jemi para një situate që futemi në një situatë akoma më të vështirë si parlament shqiptar, për shkeljet tona të procedurës. Sepse ne nuk sjellim akoma ketu rezolutën për të njohur gjenocidin serb në Kosovë.
Ky është një akt turpi për këtë parlament dhe kjo njollë po zgjerohet gjithnjë e më shumë. Janë të dyja elementet binjak, gjenocidi serb në Srebrenicë dhe ai në Kosovë, nuk mund të godasësh gjenocidin në Srebrenicë, pa pranuar, pa njohur dhe pa dënuar gjenocidin serb në Kosovë.
Nëse ne nuk do shlyejmë këtë njollë turpi, do të jetë institucionet ndërkombëtare ata që do ta prijnë dhe do të jenë ata që do të bëjnë të njëjtin veprim sic bënë për Srebrenicën edhe për Kosovën, por turpi për ne do të jetë edhe më i madh”, tha Shehu.
