Ndonëse ngritje e të ashtuquajturit Komisioni i Posaçëm anti-korrupsion ishte futur në axhendën e seancës së nesërme plenare në Kuvend për t’u miratuar, kjo gjë nuk do të ndodhë.
Socialistët kanë vendosur ta shtyjnë pas vendimit të Partisë Demokratike për të votuar kundër dhe për të mos marrë pjesë në këtë komision të posaçëm parlamentar.
Burime për Klan News bëjnë me dije se mazhoranca do të presë që të gjejë edhe dakordësinë me opozitën, edhe pse problemi nuk qëndron tek votat, pasi kërkon shumicë të thjeshtë në Kuvend.
Ngritja e këtij komisioni të posaçëm do të vijë pas miratimit të hënën në Kuvend me 76 votat e socialistëve të rezolutës “Për thellimin e reformave për mirëqeverisjen, sundimin e ligjit dhe antikorrupsionin për Shqipërinë 2030 në Bashkimin Europian”.
Bëhet fjalë për propozimin e socialistëve për ngritjen e një komisioni të posaçëm parlamentar për të forcuar luftën kundër korrupsionit dhe shtetin e së drejtës, por që është interpretuar si një tentativë e kryeministrit Edi Rama për të vënën nën kontroll SPAK-un dhe GJKKO-në.
Komisioni është konceptuar me 11 anëtarë, 6 nga PS dhe 5 nga opozita dhe do të jetë vetëm me një kryetar që do t’i përkasë mazhorancës dhe nuk do të jetë bashkëkryetar.
Në krye të këtij komisioni, Edi Rama pritet të vendosë Fatmir Xhafajn, vëllain e trafikantit të drogës Geron Xhafaj, duke e kthyer sërish për t’i shërbyer, pasi e flaku disa vite më parë nga Ministria e Brendshme.
