Shqipëria nuk ka korrupsion, por ka një projekt për vjedhje. Kështu ka deklaruar deputeti i PD-së, Tomor Alizoti nga foltorja e Kuvendit, ku po flitet për rezolutën anti-korrupsion të propozuar nga mazhoranca.
Alizoti deklaroi se drejtësia është ndërgjegje e politikanëve, ku sipas tij, nuk bëhet me një rezolutë, duke përmendur rastet e Saimir Tahirit apo Arben Ahmetajt, dy prej bashkëpunëtorëve më të ngushtë të kryeministrit Edi Rama.
Deputeti demokrat komentoi edhe takimet e kryeministrit Edi Rama me diasporën, ku tha se me emigrantët diskutohet për ekonominë dhe jo të kërcehet, teksa shtoi më tej se shqiptari sot është hyzmeqar i botës.
“A bëhet drejtësia me një projekt rezolutë?! Mendoj se drejtësia është ndërgjegje e politikanëve e një kombi. Tahiri që ishte ministër i Brendshëm i vendosi pozita apo opozita, zv.kryeministri që ka ikur e vendos pozita apo opozita.
Ne vijmë nga një sistem komunist që ndërtonte botën virtuale, propagandë. Ju mendoni se drejtësia në një shoqëri vendoset nga një projekt rezolutë?! Drejtësia është sfida më e madhe e një shoqërie, ajo gjendet në ndërgjegjen e shoqërisë dhe elitave.
Kur elita në Shqipëri sot është më e pasura në rajon, dhe deputetët janë më të pasurit në vend nuk mund të bëjnë drejtësi. Armiku më i madh i së drejtës është pushteti, armiku më i madh i shtetit është pushteti, drejtësia nuk bëhet dot me rezoluta. Nuk mund të ketë drejtësi në një sistem të padrejtë, thënie kjo nga një filozof i madh.
Sot Shqipëria nuk ka korrupsion por ka një projekt për vjedhje. Kryeministri i Shqipërisë del e kërcen nëpër Europë, por duhet të dini që këtë e bën vetëm Kryeministri i Indisë, Modi. Me emigrantët diskutohet për ekonominë dhe jo të kërcehet pasi është një komb drejt shpërbërjes. Sot shqiptari i ri është hyzmeqari i botës.. Jemi një komb që na shoqëron frika për punësim, ushqim, ekzistencë. Kjo projekt-rezolutë është frikë për të mbajtur pushtetin. Edi Rama e di që do e hanë shokët e tij, ashtu sikundër Partia e Punës hante shokët, dhe shokët do të hanë liderin.
Gjithë këto dëme në 11 vjet qeverisje, gjithë këto hajdutë, e dini që keni një ish-zv.Kryeministër që ka ikur në Shqipëria dhe akuzohet për 500 mln euro, e dini ju që shqiptarët kanë shkuar në rrugët e Botës dhe lajnë pleqtë e botës, për të siguruar jetesën e tyre? Jemi populli më emigrues sot në Botë dhe në Rajon”, tha Alizoti.
