Të ulemi me ju në një tavolinë me kampionët e korrupsionit për të luftuar korrupsionin është njësoj sikur të ulemi me personazhet e dosjes “Metamorfoza”.
Kështu është shprehur deputetja e PD-së Albana Vokshi nga foltorja e Kuvendit, teksa ka deklaruar votën kundër rezolutës së mazhorancës për ngritjen e një komisioni të posaçëm parlamentar anti-korrupsion.
Vokshi dha arsyetimin e saj pse është kundër kësaj rezolute, teksa sipas saj, nuk mund të besohet se do të mirëlqeverisemi, nga ai, duke iu referuar kryeministrit Edi Rama, që ka ardhur në pushtet përmes krimit, me synimin për të zhvatur dhe e ka kthyer qeverinë në një bandë hajdutësh.
Deputetja demokrate citoi më tej të gjitha lidhjet e Qeverisë me krimin, teksa sipas saj, Edi Rama në 11 vjet ka shkatërruar çdo shtyllë të shtetit ligjor, që ka krijuar partinë shtet. Më tej Vokshi shtroi pyetjet se a ka përdorur kryeministri Edi Rama telefona EncroChat dhe a del në përgjimet e Sky Ecc bashkë me ministrin e Brendshëm Taulant Balla dhe ministrat e tjerë.
“Është një thirrje krejt jo e sinqertë për bashkëpunim. Nuk është as koha, as mënyra as përmbajtja për këtë ftesë fake. Personalisht jam kundër dhe do të rrjeshtoj të gjitha arsyet e vendimit tim kundër kësaj rezolute apo çdo gjë që juve propozoni.
Së pari, screening është bërë nga institucionet e BE dhe nuk ka nevojë për tjetër screening. Së dyti, si pjesë e procesit të integrimit dhe negociatave, dy udhërrëfyes janë pikërisht për “rule of law” dhe fuksionimin e institucioneve demokratrike dhe reformës së administratës publike. Pra është komplet e panevojshme.
Por, kam një pyetje pyetje për të gjithë kolegët e mazhorancës. A vërtet ju vini këtu të na kërkoni neve pas 11 vitesh dhe të besojmë ne që do të mirëqeverisemi nga dikush si Edi Rama, që ka ardhur në pushtet me synimin e vetëm për të zhvatur, Qeverinë e ka kthyer në një bandë hajdutësh. Askush nuk do të mund të besojë që do të mirëqeverisemi nga dikush si Edi Rama që erdhi në pushtet nëpërmjet krimit dhe më tej e kriminalizoi parlamentin, qeverinë dhe ekonominë. Asnjë shqiptar nuk e beson që do të mirëqeverisemi nga dikush apo do të luftojë korrupsionin, ai që ka bërë ligje speciale për projekte tërësisht korruptive dhe nuk mund të vendosë as ligj as rend dikush si Edi Rama që është i lidhur kokë e këmbë me grupet më të rrezikshme kriminale. Një pyetje kam për Edi Ramën, sa telefona “EncroChat” ka përdorur ai. Po ministri i Brendshëm a ka përdorur? Sa herë del Edi Rama apo ministri i Brendshëm apo ministra të tjerë apo deputetë në përgjimet e Sky dhe Encro Chat? Kush e beson që do të mirëqeverisemi nga Edi Rama, i cili ka dhënë leje bandave kriminale për të pastruar paratë dhe i ka shndërruar ato në investitorët strategjikë.
A mund të mirëqeverisë dikush që mbas 11 vitesh keq qeverisje ka shkatërruar çdo shtyllë të shtetit ligjor, që ka krijuar partinë shtet, që kontrollon 91 deri në 95% të pushtetit politik ekonomik, institucional dhe mediat, më shumë edhe se diktatori? Sot nuk ka më kontroll dhe balancë, Kushtetua është grisur, drejtësia është nën kontroll politik pas një reforme të dështuar. Korrupsioni është i shfrenuar dhe nuk e themi ne por DASH, jemi të parët për korrupsion në Europë dhe në botë dhe rrjedhimisht të parët për mungesë të drejtash dhe lirish. Dhe pasi grumbulloi çdo pushtet, Edi Rama nisi një sulm të paprecedentë ndaj opozitës, ku me para, ku me pengmarrje, ku duke korruptuar McGonigal dhe diplomatë. Në një vend me shtet ligjor, lideri i opozitës nuk mund të mbahet në arrest pa një akuzë, pa fakte, pa dëshmimtarë .
Ju na bëni ne një ftesë sot, por si mund të ulemi ne në një tavolinë për të luftuar korrupsionin me kampionët e korrupsionit? A e keni konsultuar ju këtë rezolutë me Pëllumb Gjokën, me Bajrat, me Ndokën, me Rrahjat, me Bamët, me Dakot, Avdylajt, e me radhë? A e keni konsultuar me Ilir Beqajn, Ilir Rrapajn, Klodjan Rrepajn dhe Vilma Nushin? Të ulemi me ju në tavolinë me kampionët e korrupsionit është njësoj sikur të ulemi me personazhet e Metamorfozës. Nuk kemi bërë asgjë për qyteratë shqiptarë, sepse është pikërisht ky korrupsion me kampionët e tij që po na shuajnë dalë nga dalë. Personalisht unë jam kundër kësaj rezolute.” – tha Albana Vokshi.
