Gjykata e Durrësit ka caktuar masën e sigurisë “Arrest në shtëpi” për dy personat që u arrestuan tre ditë më parë, teksa dyshohet se tentuan të shisnin në tregun shqiptar një shumë eurosh të dyshuara të vjedhura në banka të shteteve të Bashkimit Europian.
Dy të arrestuarit që kanë lënë sot qelinë e burgut janë shtetasit Taulant Demerxhiu, 33 vjeç, banues në Fushë Krujë dhe Vladimir Kokomani, 43 vjeç, banues në fshatin Ardhishte, Shijak.
Ata u kapën tre ditë më parë në fshatin Ardhishte të Shijakut, pasi në automjetin me të cilin lëviznin, uniformkat blu gjetën 80 mijë euro që dyshohet se janë vjedhur në banka të shteteve të BE-së, me qëllim shitjen në tregun e brendshëm.
Taulant Demerxhiu dhe Vladimir Kokomani akuzohen për veprat penale “Pastrimi i produkteve të veprës penale ose veprimtarisë kriminale” dhe “Përvetësimi i parave ose mallrave që rrjedhin nga vepra penale ose veprimtaria kriminale”.
