Gazetarja Alba Kepi ka deklaruar se takimi i kryeministrit Edi Rama me emigrantët shqiptarë që jetojnë në Itali, është nisje e fushatës elektorale për zgjedhjet e vitit 2025.
E ftuar në A2CNN, Kepi tha se në Itali nuk ndihet entuziazmi që u pa në takimin e Athinës, kjo për shkak se emigrantët aty janë të zhgënjyer nga politika në vendin tonë.
“Nuk ndjehet ai lloj entuziazmi si në Athinë, emigrantët shqiptarë në Itali nuk kanë shumë besim te politika shqiptare, dhe këtë e them pa asnjë lloj rezeve, si të majtë dhe të djathtë. Unë e shoh si një nisje e fushatës elektorale, si një ftesë e Ramës për të krijuar lidhjet e tij për një votë më shumë”, tha Kepi.
Ndërsa po ashtu gazetarja dha detaje mbi takimin, nisur që nga artistët që do të performojnë, deri tek vendi i përzgjedhur. Për këtë të fundit, Kepi kishte kritika, pasi sipas saj, nuk është vend përfaqësues i rrugëtimit të shqiptarëve.
“Është vënë në dispozicion dhe një portal prenotimi për të marrë pjesë në këtë takim, do jenë Alban Skënderaj, Artiola Toska, Noizy, Anxhela Peristeri. Emri i portalit është Diaspora në Itali, por menaxhohet në qeveria në Tiranë. Mund të jenë rreth 5000 persona. Rama ka zgjedhur këtë vend sepse në Lombardi është komuniteti më i madh i shqiptarëve në Itali, mendoj që nuk është një vend përfaqësues për emigracionin shqiptar në Itali, duhet të kishte zgjedhur Barin, ose Puglia, vendi ku kanë mbërritur gomonet apo anijet e para me emigrantët shqiptarë, ose Romën, si një vend simbol për t’i dhënë dinjitet më shumë emigrantëve”, deklaroi Kepi.
