Nga Boldnews.al
Operacioni më i fundit i SPAK-ut, i konsideruar si “Metamorfoza 3”, ka meritën e vetme që u vuri emër disa prej grupeve më të rëndësishme kriminale që janë aktive në Shqipëri.
Megjithatë, rezultatet e operacionit treguan se forcat policore arrestuan shumë pak nga ata që konsiderohen si pjesë e grupeve, kryesisht persona që gjenden në burg për vepra të ndryshme penale.
Dhe, sipas të dhënave të ofruara nga vetë Struktura e Posaçme Anti-Korrupsion, hetimet më të fundit, nuk arritën të zbardhin asnjë nga vrasjet e bujshme që trondisin periodikisht opinionin publik.
Në dy ditët e fundit të javës që lamë pas, dhjetra forca policore u shpërndanë në qytete të ndryshme të vendit, me qëllim zbatimin e rreth 50 masave të sigurimit, të lëshuara nga Gjykata e Posaçme.
Urdhërat e arrestit ishin në vijim të hetimeve të zhvilluara nga SPAK-u, pasi është informuar nga autoritetet belge e holandeze mbi komunikimet e grupeve kriminale në aplikacionet Sky/Encrochat.
Emrat e grupeve
Elementët për të cilët janë nxjerrë masa sigurimi, të cilat në pjesën më të madhe të tyre nuk u arritën të ekzekutoheshin, janë personazhe që shkaktojnë frikë tek qytetarët e thjeshtë dhe që përmenden kryesisht me gjysmë zëri.
SPAK-u konsideron si grupe kriminale “klanin Duka” nga Tirana, “klanin e Ervis Martinaj” nga Laçi, “klani Avdulaj” e “klani i Lul Berishës” nga Durrësi, “klani Ndoka” nga Lezha dhe “klani Bami” nga Fushë-Kruja.
Disa prej këtyre klaneve apo personazheve, kanë hyrë e kanë dalë nga burgu, herë me dënime të rënda e herë me të lehta apo duke shfrytëzuar gropa në sistemin e drejtësisë.
Një pjesë e tyre u arrestuan rreth 5 vjet më parë, në kuadër të dosjes “339”, e cila u dështua nga vetë Prokuroria për të shpëtuar politikanët e përfshirë.
Tashmë, të njëjtët personazhe rikthehen sërish nën akuzë, megjithëse të lirë dhe në arrati.
Zero vrasje të zbardhura
Veprat penale për të cilat akuzohen së fundmi këto grupe kriminale janë të rënda, por jo më të rëndat që kanë mbi supe.
Sipas njoftimit zyrtar të SPAK-ut për operacionin më të fundit, të gjithë këta persona, akuzohen se, në episode të ndryshme, kanë tentuar të vrasin njëri-tjetrin, kanë siguruar armët, kanë bërë planet, kanë rekrutuar vrasës, por në fund nuk ia kanë arritur qëllimit.
SPAK-u rendit të paktën 7 raste atentatesh të dështuara, ndërkohë që një pjesë e këtyre personazheve, përfshirë klanin Duka apo grupi i Lul Berishës, janë aktualisht në gjykim për raste shumë të rënda, vrasje të thjeshta e atentate të sofistikuara.
Parë në këtë këndvështrim, operacioni “Metamorfoza 3” përbën ndoshta hetimin më masiv kundër grupeve kriminale, por numri i personave pas hekurave është minimal, ndërkohë që atentatet e bujshme me pasojë viktima kanë mbetur sërish pa autor.
Gjithësesi, ky hetim i SPAK-u ndikon që, të paktën për disa kohë, këta personazhe me rrezikshmëri të spikatur, të mos vijnë vërdallë nëpër Shqipëri, por të qëndrojnë në arrati. Largimi i tyre mund të zbusë disi klimën kriminale që përcjellin këta individë.
