Deputetja e Partisë Demokratike, Ina Zhupa ka denoncuar nga foltorja e Kuvendit një tjetër abuzim të ministres së Turizmit, Mirela Kumbaro.
Bëhet fjalë për linjën e trenit të vendosur së fundmi brenda parkut të Syrit të Kaltër për transportin e turistëve. Zhupa i bëri ministres Kumbaro një sërë pyetjesh për të cilat nuk mori asnjë përgjigje.
Deputetja demokrate e pyeti Kumbaron se çfarë e lidh nënkryetarin e Bashkisë Sarandë, Elton Dauti, me këtë investim privat dhe a qëndron bashkëshortja e tij, Stela Qesari, aksionere e fshehtë e kompanisë që e ka fituar. Gjithashtu, Kumbaro u pyet dhe nëse a është bërë garë e hapur dhe me kritere dhe se si u zgjodh kompania.
Por ministrja refuzoi të përgjigjej dhe nuk e ngriti kokën teksa deputetja demokrate ngriti akuza të drejtpërdrejta ndaj saj, duke e konsideruar këtë investim dhe si “treni i korruspionit”.
Kujtojmë që shërbimi privat me tren në Syrin e Kaltër ka nisur vetëm këtë sezon. Kompania që e ofron është “Saranda Taxi” pas së cilës ka dyshime që fshihet nënkryetari i Bashkisë Sarandë, Elton Dauti.
Nuk dihet ende se si është organizuar procedura publike për licencimin e këtij shërbimi dhe përzgjedhjen e kompanisë ofruese.
Të ardhurat nga ky shërbim janë të shumta pasi çdo ditë në Syrin e Kaltër gjatë sezonit sidomos shkojnë mijëra turistë, të cilët i paguajnë kompanisë private rreth 5 euro për transport.
Deputetja Ina Zhupa paralajmëroi se ditët në vazhdim do të publikojë fakte dhe prova për këtë “tren korrupsioni” në Syrin e Kaltër.
Ina Zhupa: Do desha të përfitoja nga prezenca e zonjës Kumbaro, se pata fatin që erdhi, për t’i kërkuar një shpjegim nëse ka për publikun. Vjet kur kemi bërë interpelancën bashkë, një nga momentet ka qenë pikërisht Syri i Kaltër, ku ju me të drejtë dhe unë me të drejtë ramë dakord që kishit bërë një investim për të rregulluar rrugën e Syrit të Kaltër.
Sivjet keni vendosur një tren në Syrin e Kaltër. A mund t’u thoni shqiptarëve kur është hapur gara e këtij treni? Kush e ka fituar këtë tren? A është gruaja e nënkryetarit të bashkisë aksionere në këtë tren? A keni bërë një garë të hapur dhe me kritere? Si u përzgjodh kompania dhe të kuptojmë se çfarë përfitojmë ne nga treni klientelist që ju keni vendosur edhe në Syrin e Kaltër. Sqarojauni shqiptarëve, a po punoni për turizmin apo po punoni për të mbushur xhepat e zyrtarëve tuaj që nesër t’i keni gati për vota në Qarkun e Gjirokastrës, Vlorës apo kudo nëse do të vërë ende gjëkundi kryeministri Edi Rama.
Kjo është një pyetje e drejtpërdrejtë, uroj që të ktheni përgjigje, ndaj po flet edhe në celular që të marrësh vesh më shumë për trenin e Syrit të Kaltër që për mua është një tren korrupsioni, të cilët me fakte dhe me prova do t’i publikojmë në vazhdim. Por, unë pres përgjigjen tuaj sot se si e keni përzgjedhur dhe kujt i takon ai tren në zonën turistike dhe a do të jetë ky modeli që do të shfrytëzoni të gjitha zonat turistike për të bërë qoka tek klientët, tek pushtetarët, tek ata që iu bëjnë vota ju.
