Kreu i PD-së, Sali Berisha, gjatë fjalimit të mbajtur në tubimin e sotëm poshtë banesës së tij ka folur edhe për thirrjen në SPAK të zv.kryeministres Belinda Balluku.
Berisha deklaroi se SPAK arreston hajdutët e vegjël dhe i thotë Erion Veliaj se ka arrestuar hajdutët që e kanë vjedhur atë, ndërkohë që sipas liderit demokrat, nuk ka hajdut më të madh se kryebashkiaku i Tiranës.
Ish-kryeministri u shpreh se në dosjen e SPAK janë dy shkresa të Ballukut që i thotë Erion Veliajt se ke detyrë të mbikëqyrësh dhe të raportosh për çdo punim të bërë në djegësin e Tiranës. Sipas Berishës, Veliaj nuk e vuri asnjë ditë të vetme në punë njësinë e mbikëqyrjes, sepse paratë nuk duhet të mbikëqyreshin, por të vidheshin.
Berisha i referohej shkresës së datës 10 korrik 2023, kur Balluku iu drejtua Veliaj dhe i deklaronte se dy anëtarët e Bashkisë Tiranë në Njësinë e Zbatimit të Projektit (NJZP), kishin bllokuar prej më shumë se dy vitesh punën e kësaj strukture.
Sali Berisha: Sot Skrapi i partisë thirri Belinda Ballukun. E thirri, ua them unë, shikoni taktikën e mercenarit. Arreston hajdutë të vegjël dhe u thotë qeveritarëve, i thotë Erion Veliajt, se po arrestoj hajdutët që të kanë vjedhur ty. Po ka hajdut në botë si Erion Veliaj? Ai nuk e meriton të rrijë asnjë sekondë në bashki. Ndaj dhe e marta duhet të jetë dita e fundit të tij. E thirrën Belindën sot në një kohë kur kanë në dosje dy shkresa në të cilat i thotë Erion Veliajt se ke detyrë të mbikëqyrësh dhe të raportosh për çdo punim të bërë në djegësin e Tiranës. Të mbikëqyrësh njësinë e mbikëqyrjes. Të raportosh situacionet, shpenzimet dhe çdo gjë. Po pse Erion Veliaj nuk e vuri një ditë të vetme në punë njësinë e mbikëqyrjes? Sepse paratë nuk duhet të mbikëqyreshin, por të vidheshin. Sepse nuk duhej të bëhej punë, por duhej që paratë të vidheshin. A ka hipokrizi më të madhe se kjo që bën Skrapi i partisë, afërmendshi i Edi Ramës?
