Nga Boldnews.al
Të tjera detaje kanë dalë në dritë nga hetimet e Prokurorisë së Sarandës që çuan në ndalimin e 3 ish zyrtarëve të ASHK Sarandë, mes të cilëve edhe të ish Drejtoreshës Aida Demi dhe ish deputetit Gani Hoxha.
Prokuroria e Sarandës ka zhvilluar hetime intensive 10 mujore ndaj këtyre shtetasve për veprën penale “shpërdorim detyre”. Ata dyshohet se kanë legalizuar një godinë katër kate me sipërfaqe ndërtimi për banim 1359 m2 dhe me sipërfaqe 1056 m2 aktivitet social ekonomik në hyrje të qytetit të Sarandës duke i bashkangjitur edhe një truall prej 1000 m2. Bëhet fjalë pikërisht për pasurinë me nr. 27/528 e cila pasi është legalizuar, është pajisur edhe me certifikatë pronësie në emër të shtetasit Gani Hoxha, ish deputet i Partisë Demokratike.
Legalizimi dhe rregjistrimi i pronës në fakt kanë qenë të paligjshëm, pasi prona ka qenë më parë e rregjistruar në ZVRPP Sarandë në emër të familjes Sejko nga Saranda. Trualli në fakt, prej vitesh i është dhënë me qera një kompanie shitjesh materiale hidrosanitare, ndërsa brenda tij rezulton edhe objekti 3 katësh, i cili i’u rregjistruar Gani Hoxhës brenda pronës së familjes Sejko.
ASHK Sarandë mësohet se ka kryer procedura të njëpasnjëshme në fillim të vitit 2023 si lëshim leje legalizimi dhe më pas pajisje me certifikatë pronësie, të cilat në një rast, sipas burimeve, janë kryer në një kohë rekord, ndryshe nga raste të tjera analoge. Nga ana e ASHK Sarandë është tentuar “mbulimi” i gabimit duke vendosur masë kufizimi mbi pronën dhe në gusht 2023 edhe anullim të lejes së legalizimit, por gjithë praktika u arrit të sekuestrohej më parë nga Prokuroria e Sarandës pas kallëzimit të kryer nga të dëmtuarit në korrik 2023.
Ish Drejtoresha e ASHK Sarandë, Aida Demi, u shkarkua nga detyra në 12 janar të këtij viti me urdhër të Drejtoreshës së Përgjithshme të ASHK, Dallëndyshe Bici. Ajo qëndroi në detyrë për rreth 2 vjet e 4 muaj. Shkak u bë transmetimi i një emisioni investigativ lidhur me legalizime dhe rregjistrime të dyshimta pronash në Sarandë dhe Ksamil, përfshirë edhe prona të familjes së ish Drejtoreshës.
Në të njëjtën ditë oficerë te Komisariatit të Sarandës kryen kontroll të banesës së Demit, bizneseve të familjes së saj por dhe në zyrat e ASHK Sarandë, duke sekuestruar dosjet e denoncuara ndërkohë që u kryen dhe procedurat e fotografimit dhe matjes së objekteve. Këto dosje ndodhen tashmë të sekuestruara dhe në hetim në një procedim të vecantë nga Prokuroria e Sarandës.
Ndërsa ish zyrtarët Lika dhe Stroka, u ndaluan me urdhër të Prokurorisë së Sarandës në 13 mars të këtij viti, lidhur me legalizimin e hotelit 7 katësh të ndërtuar pa leje nga ish Drejtori i ALUIZNI Sarandë, Mariel Murati. Prej atëherë ata ndodhen nën një tjetër masë sigurimi “Arrest në shtëpi”, duke u ngarkuar tashmë me dy masa të njëjta për dy cështje të ndryshme.
