Partia Demokratike ka denoncuar se si bashkëshorti dhe vjehrri i ministres Delina Ibrahimaj kanë biznese dhe hotele super luksoze në jug të vendit. Denoncimi vjen pasi bashkëshorti i Ibrahimajt u përfshi në një skandal pasi goditi me thikë një zyrtar të ministrisë që drejtonte e shoqja.
Zëdhënësja për Antikorrupsionin në PD, Genta Vangjeli i bëri thirrje SPAK që të sqarojë çështjen e pasurive të familjes së ministres.
“Edi Rama mesa duket është i vendosur që përpara se të largohet nga detyra e KM të sigurohet që të gjithë familjarët e ministrave të tij të pajisen me pasuri e biznese, bare e restorante por mbi të gjitha hotele në territore të lakmuara në bregdet.”- shprehet Vangjeli.
Vangjeli shprehet se ministrat e Ramës nuk bëjnë kujdes as t’i fshehin aktivitetet private të familjarëve të tyre për të shmangur konfliktin e interesit. Ajo shton më tej se i vetmi kujdes që ata tregojnë është “për të fshehur plagosjet që bëjnë, siç është rasti i bashkëshortit të ministres Delina Ibrahimaj, që u ‘arkivua’ nga policia pas presionit politik. Ibrahimaj duhet të ishte dorëhequr tashmë nga detyra publike për shkak fshehjes së veprës penale të kryer nga bashkëshorti i saj”.
PD denoncon se bashkëshorti i minustres ka disa aktivitete tregtare.
Referuar vetëdeklarimeve pranë ILDKPI, bashkëshorti i ministres Ibrahimaj, Andri Përparim Ibrahimaj rezulton:
1. Drejtues në hotelin super luksoz me pronar babain e tij, ‘Atlantid Hospitality’ në Qeparo, në bregun e detit.
2. Pronar i subjektit tregtar ‘Baçja’ shpk me objekt ushtrim aktiviteti bar- restorant etj.
3. Pronar i subjektit tregtar ‘Red Field Farm’ shpk, me objekt Mbjellje, kultivim dhe tregtim fruta – perime te llojeve te ndryshme etj, me adresë në Kurbin.
4. Pronar i subjektit tjetër tregtar ‘Te Baçja’ shpk me nr. tjetër identifikimi, por me objekt e adresë të njëjtë të ushrimit të aktivitetit me sa më lart.
Vangjeli deklaron se, meqenëse ligji për konfliktin e interesit vlerëson se kur aksionet e pronësisë të regjistruara në emër të personit të lidhur me zyrtarin, në këtë rast në emër të vjehrrit dhe bashkëshortit të ministres, vlerësohen njësoj sikur të ishin të regjistruara në emrin e vetë zyrtares Ibrahimaj, ajo duhet të japë llogari para SPAK.
Vangjeli thotë se është koha që Delina Ibrahimaj, së bashku me familjarët të sqarojë opinionin publik dhe SPAK, lidhur me:
1. Burimin e të ardhurave dhe procedurat e kalimit të pronësisë së pasurisë nr.129/113-ND, volumi 12, faqe 187, zk.3095 në Qeparo,Vlorë, dhe procedurat ligjore që u ndoqën për ndërtimin e hotelit.
2. Arsyen e shkeljes me vetëdije të ligjit me qëllim përfitimin personal e familjar.
