Kryedemokrati Sali Berisha ka folur sot me tone të ashpra për projektligjin e Qeverisë Rama “Për shëndetin seksual dhe riprodhues”, i cili, veç problemeve të tjera që paraqet, i hap dyert “surrogacisë” – dhënies së trupit të nënave me qira.
Berisha e konsideron si një nismë monstruoze, çnjerëzore dhe antishqiptare të një regjimi socialist që i ka vënë vetes mision historik shkatërrimin e kombit shqiptar.
Lideri i opozitës shprehet se Edi Rama po zbaton doktrinën e një monstre tjetër të njerëzimit pas Karl Marksit, atë të Xhorxh Sorosit.
“Pas instalimit të një kuadri politik shpopullues të këtij vendi, kuadër që ju imponoi rreth 35 përqind të shqiptarëve të braktisin vendin e tyre në një hark kohor 8-vjeçar. Kuadër që zëvendësoi sigurinë dhe ligjin me antishtetin dhe narkoshtetin, tani në përputhje të plotë me doktrinën e Çubrilloviçit, i cili në epiqendër të betejës kishte nënën shqiptare, ky famëzi që në histori ka ekuivalent vetëm Edi Ramën, kishte përcaktuar si objektiv kryesor nënën shqiptare për të shkatërruar kombin shqiptar.
Edi Rama në angazhimin e tij, ky antishqiptar në çdo aspekt, në angazhimin e tij për rrënimin e këtij kombi zbret tani në themelimin e kombit.
Në themelin e shoqërisë, në shenjtërinë e kombit dhe të shoqërisë, familja.
Ai zbaton doktrinën e një monstre tjetër të njerëzimit pas Karl Marksit, Xhorxh Sorosit.
Midis doktrinës komuniste për familjen në finalen e ndërtimit të shoqërisë dhe doktrinës së Xhorxh Sorosit, ndryshojnë vetëm termat, por rezultatet janë të njëjta.”- shprehet Berisha ndër të tjera në tryezën e debatit që u zhvillua në PD nga Koalicioni Shqiptar Pro Familjes dhe Jetës dhe Partia Demokratike.
