Gjykata e Apelit të Posaçëm ka hedhur shortin për treshen e gjyqtarëve, që do të shqyrtojnë ankimimin e kryebashkiakut të zgjedhur të Himarës, Fredi Beleri dhe bashkëpunëtorit të tij, Pandeli Kokoveshi.
Sipas shortit të hedhur ditë, trupi gjykues përbëhet nga gjyqtarja Daniela Shirka (kryesuese), Dhimitër Lara (Anëtar), dhe Iliriana Olldashi (Anëtare).
Fredi Beleri është dënua më 5 Mars me dy vite burgim nga GJKKO, duke u shpallur fajtor për veprën “korrupsion aktiv në zgjedhje”. Ndërsa Pandeli Kokoveshi u dënua me 1 vit e 6 muaj burg, por dënimi me burg për të është pezulluar dhe do të qëndrojë 3 vite në shërbim prove.
Arrestimi i Fredi Belerit ndodhi në 12 Maj, dy ditë para zgjedhjeve lokale të vitit të kaluar. SPAK ka pretenduar se ka provuar tej çdo dyshimi se ai i kishte ofruar një bashkëpunëtori të policisë 50 euro për çdo votë që mund të gjente në favor të tij si kryetar i Bashkisë së Himarës.
Që prej arrestimit, Fredi Beleri qëndron në burgim, duke mos u lejuar që të betohet si kryebashkiak i Himarës.
Gjithashtu, vlen të theksohet fakti se kryeministri grek Kyriakos Mitsotakis e ka përfshirë Fredi Beleri në listën e 42 kandidatëve të Partisë “Demokracia e Re” në garën për një mandat në Parlamentin Europian.
Njoftimi:
Gjykata e Posaçme e Apelit për Korrupsionin dhe Krimin e Organizuar, më 08.05.2024, regjistroi çështjen penale nr. 32 akti, mbi ankimin e ankuesve/të pandehur Dh.A.B. dhe P.K., me objekt: “Ankim ndaj vendimit nr. 14, datë 05.03.2024 të Gjykatës së Posaçme të Shkallës së Parë për Korrupsionin dhe Krimin e Organizuar” që ka deklaruar fajtor të pandehurit për kryerjen e veprës penale “Korrupsioni aktiv në zgjedhje”, kryer në bashkëpunim, parashikuar nga nenet 328-25 të Kodit Penal.
Sipas shortit të datës 09.05.2024, trupi gjykues përbëhet nga gjyqtarja Daniela Shirka (kryesuese), Dhimitër Lara (Anëtar), dhe Iliriana Olldashi (Anëtare).
