Nënkryetari i Këshillit Bashkiak të Tiranës, Dorian Teliti, në protestën e gjashtë qytetare para bashkisë së Tiranës, deklaroi se Edi Rama ka filluar të bëjë hapa pas.
Teliti deklaron se Rama, i cili para disa javëve i jepte mbështetjen e pakushtëzuar Veliajt, sot u distancua nga ai kur foli për hajdutë, abuzues ligji, grupe të strukturuara, drejtorë dhe kryebashkiakë.
“Një falënderim të gjithëve ju për këtë rezistencë, këtë protestë të gjashtë, para godinës që ka përdhosur interesat publike, që ka vjedhur paratë e taksapaguesve shqiptarëve.
Ashtu siç Erion Veliaj, kryefiku, lepuri në krye të bashkisë së Tiranës, ka prishur Teatrin dhe dhjetëra e dhjetëra pallate të tjera duke i shkërrmoqur ato, ashtu dhe sot, falë rezistencës tuaj, të shkërrmoqim kryeshtetin e kryebashkiakut në krye të bashkisë më të korruptuar, në krye të bashkisë 100% të vjedhur dhe ne sot po ia dalim.
Jemi afër arritjes së objektivit tonë madhor, dorëheqjen përfundimtare të Erion Velisë dhe më pas, dorëheqjen edhe të kryeministrit të Shqipërisë.
Është rezistenca juaj që sot bëri të mundur që Edi Rama të bëjë disa hapa pas.
Ai që para disa javëve i jepte mbështetjen e pakushtëzuar Erion Velisë, sot u distancua nga ai. Foli për hajdutë, Edi Rama; foli për abuzues ligji; foli për grupe të strukturuara; foli për drejtorë dhe kryebashkiakë… Kjo u arrit vetëm në sajë të qëndresës suaj dhe të forcës suaj protestuese.”- tha Teliti.
