Kryeministri Edi Rama ka planifikuar një tur takimesh me komunitetin shqiptar në diasporë dhe në 12 Maj ka planifikuar një takim me shqiptarët në shtetin helen.
Por, mediat greke raportuan se Athina zyrtare nuk i kishte dhënë leje për të mbajtur këtë takim në hollin olimpik “Gallatsi” të Athinës. “Kathimerini” raportoi se Ministria e Jashtme greke i ka përcjellë njerëzve pranë kreut të qeverisë shqiptare mesazhin se Athina zyrtare do të preferonte që vizita e shefit të qeverisë shqiptare të shtyhej pas 9 qershorit, për shkak të fushatës për zgjedhjet për parlamentin europian.
Por, kryeministri Edi Rama duket këmbëngulës për këtë takim dhe konfirmoi se do të jetë në Athinë, në datën e planifikuar prej tij. Ai ka shpërndarë në rrjetet sociale një video që përmbledh takimet e tij me zyrtarë të lartë grekë, këtej e andej kufirit.
“Me një kujtesë për ata ndër ju që janë në Greqi, se në 12 maj nisim nga Athina rrugëtimin e pranverës në diasporë Krenar për Shqipërinë, ku do të ishte kënaqësi e posaçme të takoheshim, ju uroj të gjithëve një fundjavë të mbarë” – shkruante Rama.
Por, këmbëngulja e Ramës për ta mbajtur takimin më 12 Maj, përveç se si një ndërhyrje në zgjedhje, është parë edhe si një provokim nga mediat greke.
Ato rikujtojnë se 12 Maji është një vjetori i arrestimit të kryebashkiakut të zgjedhur të Himarës, Fredi Belerit i cili tashmë është kandidati i Partisë “Demokracia e Re” për parlamentin europian.
Athina zyrtare ka këmbëngulur që atij t’i jepet leje për t’u betuar si kryebashkiak i Himarës, madje ka akuzuar shtetin shqiptar, për shkelje të të drejtave.
