Ka përfunduar pas gati 3 orësh protesta e mbajtur te Bashkia e Tiranës, ku qytetarët dhe aktivistët kërkuan dorëheqjen e kryebashkiakut Veliaj pas skandaleve që kanë përfshirë së fundmi Bashkinë.
Ashtu si katër protestat e zhvilluara më herët edhe protesta e sotme u shoqërua me thirrje “Hajdut”, “Hajdut” “Shko te shokët”, teksa nuk kanë munguar edhe molotovët e frutat të cilët janë hedhur në shenjë revolte drejt derës së Bashkisë të mbyllur me dryn.
Pjesë e protestës ishin edhe aktorë dhe regjisorë të njohur, si Edmond Budina, dhe Neritan Liçaj, të cilët u bënë thirrje qytetarëve që të bashkohen në protestat e radhës kundër Veliajt, të cilin e akuzojnë si hajdutin e miliona eurove të vjedhura nga taksat e qytetarëve.
Në protestë nuk munguan edhe përplasjet me policinë, pasi qytetarët dhe këshilltarët opozitarë tentuan të futeshin në godinë duke hequr gardhin metalik, por janë ndaluar nga efektivët.
Protesta u mbyll në orën 19:30, dhe protesta e radhës u njoftua ditën e martë në orën 11:00.
Në mbyllje të protestës, anëtari i Kryesisë së PD-së, Belind Këlliçi u shpreh se nuk do të largohen derisa Veliaj të japë dorëheqjen.
