Kreu i Partisë së Lirisë, Ilir Meta ka sqaruar problemet në Partinë e Lirisë për të cilat nevojitet riorganizimi i Konventës së 27 prillit. I ftuar në emisionin ‘Frontline’ në Report Tv, Meta ka deklaruar se organizimi aktual i PL-së nuk funksiononte dhe se duhet një parti shumë demokratikenë statut.
“Është një rithemelim, që vjen si domosdoshmëri për ta shndërruar PL në instrumentin më të fuqishëm opozitar dhe nesër qeverisës për të garantuar 5 prioritetet që ndalojnë shpopullimin dhe garantojnë 4 milionë banorë plus shumë shpejt. Organizimi aktual nuk funksiononte. Modeli president, zv president, sekretar i përgjithshëm garanton një parti shumë ekzekutive. Një parti shumë demokratike në statut. Dhe kemi disa kandidatura deri tani. Kanë qenë të mirëpritur të gjithë, të paraqesin platformën e tyre. Gjithçka është bërë publike. Do jetë transparent. Kërkojmë që PL të meritoj emrin e saj dhe këtë e bën vetëm duke u hapur dhe luftuar në gjithë drejtuesit e saj në të gjitha nivelet”, tha Meta.
Nga ana tjetër Meta theksoi se roli i gruas së tij Monika Kryemadhi në Partinë e Lirisë pas Konventës së 27 prillit do të jetë anëtare e Komitetit Drejtues Kombëtar. Ndërkohë që tha se nëse Kryemadhi do të qendroj në Kryesi, duhet t’i nënshtrohet një votimi.
“Është perceptim i gabuar, zonja Kryemadhi është deputete. Mund të jetë në të ardhmen deputete. Ajo do të jetë në çdo rast anëtare e Komitetit Drejtues Kombëtar. Nëse ajo dëshiron të qendroj në Kryesi duhet ti nënshtrohet një votimi, por problemi nuk është ky. Është më i gjerë, një nepotizëm i përmase më të gjerë në strukturat e rinisë dhe të partisë sonë. Kemi problem të madh në Krujë, por shpresoj t’i zgjidhim me mirëkuptim. Zgjidhjet do jenë shumë demokratike. Problemi më i madh është që Shqipëria vuan nga nepotizmi në administratë, në qeveri. Në sistemin e drejtësisë, në sistemin e doganës. Kjo ka pasoja të tmerrshme për funksionimin e administratës,” tha Meta.
